narKH baala kun ki arzani hunuz

abhī abhī ik havā kā jhoñkā

jo terā lahja

jo tere gītoñ paheliyoñ kā amiin ban kar

samā.atoñ ko

hazār lafzoñ kī dāstāneñ sunā gayā hai

abhī abhī be-karāñ sā lamha

jo kitnī sadiyoñ kā bojh uThā.e

guzar gayā hai

jo merī āñkhoñ meñ so.e manzar jagā gayā hai

abhī abhī terā ik sahīfa ik ahd ban kar

dayār-e-dil meñ utar gayā hai

mirā badan reza reza ho kar bikhar gayā hai

maiñ dekhtā huuñ

ki naam terā

zabān terī

kalām terā

zamīñ kī pastī se

āsmāñ kī bulandiyoñ tak

har aane vaale nisāb lamhe kā

peshvā hai

maiñ sochtā huuñ

ki tujh pe likkhūñ

jo tujh pe likkhā

to harf mere

havā meñ tahlīl ho ga.e haiñ

meñ chāhtā huuñ

ki tujh ko sochūñ

jo tujh ko sochā

to zaat terī

paheliyoñ meñ ulajh ga.ī hai

abhi abhi ek hawa ka jhonka

jo tera lahja

jo tere giton paheliyon ka amin ban kar

samaaton ko

hazar lafzon ki dastanen suna gaya hai

abhi abhi be-karan sa lamha

jo kitni sadiyon ka bojh uThae

guzar gaya hai

jo meri aankhon mein soe manzar jaga gaya hai

abhi abhi tera ek sahifa ek ahd ban kar

dayar-e-dil mein utar gaya hai

mera badan reza reza ho kar bikhar gaya hai

main dekhta hun

ki nam tera

zaban teri

kalam tera

zamin ki pasti se

aasman ki bulandiyon tak

har aane wale nisab lamhe ka

peshwa hai

main sochta hun

ki tujh pe likkhun

jo tujh pe likkha

to harf mere

hawa mein tahlil ho gae hain

mein chahta hun

ki tujh ko sochun

jo tujh ko socha

to zat teri

paheliyon mein ulajh gai hai