naujawanon ke nam

ye kin ḳhayāloñ meñ kho rahe ho na.ī hai buniyād-e-āshiyāna

chaman kī ta.amīr is tarah ho ki rashk tum par kare zamāna

ye jaan lo kis maqām par ho chunā hai kis rahguzar ko tum ne

uTho ki tahzīb-e-nau ne baḌh kar badal diyā dahr kā fasāna

tumhāre azm-o-amal meñ pinhāñ faroġh-e-ālam kī quvvateñ haiñ

badal do tadbīr se muqaddar hanūz hālāt kā nishāna

jo dil meñ manzil kī aarzū hai to siikh lo tum ai nau-javāno

har ek aafat kā ruḳh badalnā har ik musībat par muskurānā

tumheñ ḳhabar hai ki ahd-e-māzī meñ daur aise bhī aa chuke haiñ

paḌe rahe tum hī ġhaflatoñ meñ pukārtā rah gayā zamāna

nayā zamāna na.ī hai mahfil na.e haiñ barbat na.ī tarangeñ

purāne rāgoñ ko band kar do fazā ko de do nayā tarāna

na ahl-e-duniyā kī samt dekho judā judā hai mafād sab kā

agarche koshish karoge dil se banegā firdaus āshiyāna

maza to jab hai ai nau-javāno kahe tumheñ āfrīñ mūarriḳh

abhī to hai vaqt sabt kar do tum apnā tārīḳh meñ fasāna

ye kin KHayalon mein kho rahe ho nai hai buniyaad-e-ashiyana

chaman ki tamir is tarah ho ki rashk tum par kare zamana

ye jaan lo kis maqam par ho chuna hai kis rahguzar ko tum ne

uTho ki tahzib-e-nau ne baDh kar badal diya dahr ka fasana

tumhaare azm-o-amal mein pinhan farogh-e-alam ki quwwaten hain

badal do tadbir se muqaddar hanuz haalat ka nishana

jo dil mein manzil ki aarzu hai to sikh lo tum ai nau-jawano

har ek aafat ka ruKH badalna har ek musibat par muskurana

tumhein KHabar hai ki ahd-e-mazi mein daur aise bhi aa chuke hain

paDe rahe tum hi ghaflaton mein pukarta rah gaya zamana

naya zamana nai hai mahfil nae hain barbat nai tarangen

purane ragon ko band kar do faza ko de do naya tarana

na ahl-e-duniya ki samt dekho juda juda hai mafad sab ka

agarche koshish karoge dil se banega firdaus aashiyana

maza to jab hai ai nau-jawano kahe tumhein aafrin muarriKH

abhi to hai waqt sabt kar do tum apna tariKH mein fasana