naukri

baat itnī sī thī

ek gul-chīñ ke hāthoñ lagāyā gayā baaġh

us ke hī hāthoñ se miltī huī parvarish ke liye

muntazir thā magar

ab vo gul-chīñ to gul-chīñ rahā hī nahīñ hai ki us ko

kisī aur hī kaam se duur jaanā paḌā hai

use rang-o-bū chhoḌ kar filoñ ko uThānā paḌā hai

use fikr itnī hai us ke ugaa.e hue phuul sūkheñ nahīñ

Tahniyoñ se alag ho ke TūTeñ nahīñ

aur kisī baat par us se rūTheñ nahīñ

baat itnī sī hai

bāġhbānī koī naukrī to nahīñ

baaġh samjhe na samjhe ye gul-chīñ to is dukh meñ Duubā huā hai ki us ne abhī tak usī ke lagā.e hue phūloñ ke rang dekhe nahīñ haiñ

vo bāzār se itr kī shīshiyāñ lā ke kamre meñ baiThā huā us mahak ko banāne kī koshish meñ hai jis se mahrūm hai

baat itnī sī hai

vo jo gul-chīñ thā ab duuje peshe meñ hai

aur vo apne liye kuchh nahīñ kar rahā

baat itni si thi

ek gul-chin ke hathon lagaya gaya bagh

us ke hi hathon se milti hui parwarish ke liye

muntazir tha magar

ab wo gul-chin to gul-chin raha hi nahin hai ki us ko

kisi aur hi kaam se dur jaana paDa hai

use rang-o-bu chhoD kar filon ko uThana paDa hai

use fikr itni hai us ke ugae hue phul sukhen nahin

Tahniyon se alag ho ke TuTen nahin

aur kisi baat par us se ruThen nahin

baat itni si hai

baghbani koi naukri to nahin

bagh samjhe na samjhe ye gul-chin to is dukh mein Duba hua hai ki us ne abhi tak usi ke lagae hue phulon ke rang dekhe nahin hain

wo bazar se itr ki shishiyan la ke kamre mein baiTha hua us mahak ko banane ki koshish mein hai jis se mahrum hai

baat itni si hai

wo jo gul-chin tha ab duje peshe mein hai

aur wo apne liye kuchh nahin kar raha