naukri

kisī shaḳhs ke saath leTā huā maiñ

nihāyat zarūrī kisī baat par

apnī saarī samajh lā ke mad.hosh huuñ

aur apne hī andar se chillā rahā huuñ

ki kal sub.h mujh ko kisī bhī tarah

is ajiib aadmī se mafar chāhiye

ki ye aadmī bhī mujhe ik jagah roknā chāhtā hai

magar maiñ to maiñ huuñ ki mujh ko to keval safar chāhiye

haañ mafar chāhiye mujh ko is shaḳhs se jo

mirī shakl meñ merī marzī se haT kar

mirī soch ke dā.eroñ se pare hī jiye jā rahā hai

jo karne nahīñ haiñ vo sab aise pesha kiye jā rahā hai

mafar chāhiye is kī nādāniyoñ se

mafar chāhiye is ke hisse meñ aatī pareshāniyoñ se

mafar chāhiye is kī us zaat se jis ko duniyā

mire naam se to bhale jāntī hai magar ek shā.ir nahīñ māntī

balki ik pesha-var aadmī kī tarah dekhtī rahtī hai

ab maiñ is ke binā shā.irī ke samundar meñ tanhā safar chāhtā huuñ

maiñ misroñ kī maujoñ pe bahtā huā apne hāthoñ ke hisse hunar chāhtā huuñ

maiñ Dar chāhtā huuñ ki is nazm meñ bhī faūlun faūlun kī tai-shuda ravānī banī hī rahe

kuchh zarūrī tavāzun-o-tartīb kho.e binā is ke uslūb meñ ik javānī banī hī rahe

ḳhair ye shaḳhs jo mere sañg mere andar hī

leTā huā hai bahut DhiiT hai

is ko merī tarah koī parvā nahīñ hai

ki ab is kī duniyā meñ duniyā nahīñ hai

ai bujhte qamar ham-safīr-e-bashar

ab maiñ so jaatā huuñ aur ye tū dekhnā

raat kī vus.ateñ kyā nigal jā.eñgī

aur mirī sub.h ke hisse kyā aa.egā

kisi shaKHs ke sath leTa hua main

nihayat zaruri kisi baat par

apni sari samajh la ke madhosh hun

aur apne hi andar se chilla raha hun

ki kal subh mujh ko kisi bhi tarah

is ajib aadmi se mafar chahiye

ki ye aadmi bhi mujhe ek jagah rokna chahta hai

magar main to main hun ki mujh ko to kewal safar chahiye

han mafar chahiye mujh ko is shaKHs se jo

meri shakl mein meri marzi se haT kar

meri soch ke daeron se pare hi jiye ja raha hai

jo karne nahin hain wo sab aise pesha kiye ja raha hai

mafar chahiye is ki nadaniyon se

mafar chahiye is ke hisse mein aati pareshaniyon se

mafar chahiye is ki us zat se jis ko duniya

mere nam se to bhale jaanti hai magar ek shair nahin manti

balki ek pesha-war aadmi ki tarah dekhti rahti hai

ab main is ke bina shairi ke samundar mein tanha safar chahta hun

main misron ki maujon pe bahta hua apne hathon ke hisse hunar chahta hun

main Dar chahta hun ki is nazm mein bhi faulun faulun ki tai-shuda rawani bani hi rahe

kuchh zaruri tawazun-o-tartib khoe bina is ke uslub mein ek jawani bani hi rahe

KHair ye shaKHs jo mere sang mere andar hi

leTa hua hai bahut DhiT hai

is ko meri tarah koi parwa nahin hai

ki ab is ki duniya mein duniya nahin hai

ai bujhte qamar ham-safir-e-bashar

ab main so jata hun aur ye tu dekhna

raat ki wusaten kya nigal jaengi

aur meri subh ke hisse kya aaega