naya ghar

kahīñ duur bastī kī āġhosh meñ

vo humaktā huā ik nayā ghar

apne atrāf se be-ḳhabar

nanhe bachche ke mānind hañstā huā

ik na.e-pan kī ḳhushbū meñ bastā huā

hamesha mujhe aur tum ko bulātā rahegā

apnī muTThī ke ghuñghrū bajātā rahegā

vo nayā ghar jo merā tumhārā nahīñ thā

kisī taur se bhī hamārā nahīñ thā

kūcha kūcha bhaTakte hue jis ke dar par

thake-hāre ham tum shikasta-dil o ḳhāk-basar

tan pe bār-e-nadāmat uThā.e hue ruk ga.e the

us ke dīvār-o-dar farsh o āñgan

hameñ dekh kar kis tarah jhuk ga.e the

us ke phaile hue bāzuoñ ne

hameñ is tarah se samoyā

aur aisī jagah dī

ki chehroñ kī miTTī rifāqat kī afshāñ banī

aur nadāmat kī zardī na jaane kahāñ miT ga.ī

mujh ko aisā lagā jaise anmol motī

tah-e-āb se mauj-dar-mauj laḌtā huā

ḳhud kināre tak aa.e

apnā ḳhākistarī ḳhol sūraj kī tahvīl meñ de ke

saarī thakan bhuul jaa.e

phir shuā-e-mohabbat se saarā jahāñ jagmagā.e

mere dal ne duā dī ḳhudāvañd-e-bartar

isī raushnī meñ nahātā rahe ye nayā ghar

apnī muTThī ke ghuñghrū bajātā rahe ye nayā ghar

hamārī tarah dūsre dil-zadoñ ko bulātā rahe ye nayā ghar

kahin dur basti ki aaghosh mein

wo humakta hua ek naya ghar

apne atraf se be-KHabar

nanhe bachche ke manind hansta hua

ek nae-pan ki KHushbu mein basta hua

hamesha mujhe aur tum ko bulata rahega

apni muTThi ke ghunghru bajata rahega

wo naya ghar jo mera tumhaara nahin tha

kisi taur se bhi hamara nahin tha

kucha kucha bhaTakte hue jis ke dar par

thake-haare hum tum shikasta-dil o KHak-basar

tan pe bar-e-nadamat uThae hue ruk gae the

us ke diwar-o-dar farsh o aangan

hamein dekh kar kis tarah jhuk gae the

us ke phaile hue bazuon ne

hamein is tarah se samoya

aur aisi jagah di

ki chehron ki miTTi rifaqat ki afshan bani

aur nadamat ki zardi na jaane kahan miT gai

mujh ko aisa laga jaise anmol moti

tah-e-ab se mauj-dar-mauj laDta hua

KHud kinare tak aae

apna KHakistari KHol suraj ki tahwil mein de ke

sari thakan bhul jae

phir shua-e-mohabbat se sara jahan jagmagae

mere dal ne dua di KHudawand-e-bartar

isi raushni mein nahata rahe ye naya ghar

apni muTThi ke ghunghru bajata rahe ye naya ghar

hamari tarah dusre dil-zadon ko bulata rahe ye naya ghar