naya istiara

use dekhte hī

tamāzat kā ehsās baḌhne lagā hai

ye dīvāreñ kaisī uThā.ī ga.ī thiiñ

ki jin kī bulandī

hamāre saroñ se churā le ga.ī chhat

ye dahlīz kin pattharoñ se banī thī

ki jis ko kabhī paar karne kī himmat nahīñ thī kisī meñ

ye ghar kaisā ghar hai

ki dīvār-o-dar is meñ be-intihā haiñ

ye bāhar kā rasta nahīñ shart koī

na saaya hai us ke muqaddar kā likkhā

faqat chilchilātī huī dhuup detī hai pahra

ye be-sā.ebāñ ghar

ki jis se kabhī kuchh shikāyat nahīñ thī

ise kyoñ malāmat se takne lage haiñ

koī abr-pāra

koī shāḳh-e-zaitūn

agar hai bhī sar par to bas ek lamha

tamāzat kā jaise nayā isti.āra

use dekhte hi

tamazat ka ehsas baDhne laga hai

ye diwaren kaisi uThai gai thin

ki jin ki bulandi

hamare saron se chura le gai chhat

ye dahliz kin pattharon se bani thi

ki jis ko kabhi par karne ki himmat nahin thi kisi mein

ye ghar kaisa ghar hai

ki diwar-o-dar is mein be-intiha hain

ye bahar ka rasta nahin shart koi

na saya hai us ke muqaddar ka likkha

faqat chilchilati hui dhup deti hai pahra

ye be-saeban ghar

ki jis se kabhi kuchh shikayat nahin thi

ise kyon malamat se takne lage hain

koi abr-para

koi shaKH-e-zaitun

agar hai bhi sar par to bas ek lamha

tamazat ka jaise naya istiara