naya janm

ajnabī jaan ke ik shaḳhs ne yuuñ mujh se kahā

vo makāñ niim kā vo peḌ khaḌā hai jis meñ

khiḌkiyāñ jis kī ka.ī saal se lab-basta haiñ

jis ke darvāze kī zanjīr ko hasrat hī rahī

koī aa.e to vo hāthoñ meñ machal ke rah jaa.e

shor-e-be-rabti-e-āhañg meñ Dhal ke rah jaa.e

vo makāñ jis ke dar-o-bām ka.ī sāloñ se

muntazir haiñ, koī mahtāb-sifat shahzāda

un kā har gosha-e-tārīk munavvar kar de

log kahte haiñ yahāñ raat ke sannāTe meñ

kuchh ajab tarah kī āvāzeñ huā kartī haiñ

chūḌiyāñ pā.eleñ pāzebeñ bajā kartī haiñ

ek āvāz ki ''tum ne to mujhe chāhā thā''

ek āvāz ki ''tum ahd-e-vafā bhuul ga.e''

ek siskī ki ''mirā sāġhar-e-jam TuuT gayā''

ek naala ki ''mirā mujh se sanam chhūT gayā''

log kahte haiñ ka.ī saal hue is ghar meñ

ḳhūb-sūrat sā koī shaḳhs rahā kartā thā

chāñdnī rātoñ meñ ash.ār kahā kartā thā

ḳhūb-rūvoñ ne use jān-e-vafā jaanā thā

jaane kis kis ne use apnā ḳhudā maanā thā

log kahte haiñ ki ik raat ke sannāTe meñ

ik parī aa.ī idhar taḳht-e-sulaimānī par

jaane kis des uḌā le ga.ī shahzāde ko

ajnabī jaan ke us shaḳhs ne yuuñ mujh se kahā

maiñ magar soch rahā thā ki koī pahchān na le

ajnabi jaan ke ek shaKHs ne yun mujh se kaha

wo makan nim ka wo peD khaDa hai jis mein

khiDkiyan jis ki kai sal se lab-basta hain

jis ke darwaze ki zanjir ko hasrat hi rahi

koi aae to wo hathon mein machal ke rah jae

shor-e-be-rabti-e-ahang mein Dhal ke rah jae

wo makan jis ke dar-o-baam kai salon se

muntazir hain, koi mahtab-sifat shahzada

un ka har gosha-e-tarik munawwar kar de

log kahte hain yahan raat ke sannaTe mein

kuchh ajab tarah ki aawazen hua karti hain

chuDiyan paelen pazeben baja karti hain

ek aawaz ki tum ne to mujhe chaha tha

ek aawaz ki tum ahd-e-wafa bhul gae

ek siski ki mera saghar-e-jam TuT gaya

ek nala ki mera mujh se sanam chhuT gaya

log kahte hain kai sal hue is ghar mein

KHub-surat sa koi shaKHs raha karta tha

chandni raaton mein ashaar kaha karta tha

KHub-ruwon ne use jaan-e-wafa jaana tha

jaane kis kis ne use apna KHuda mana tha

log kahte hain ki ek raat ke sannaTe mein

ek pari aai idhar taKHt-e-sulaimani par

jaane kis des uDa le gai shahzade ko

ajnabi jaan ke us shaKHs ne yun mujh se kaha

main magar soch raha tha ki koi pahchan na le