naya KHun

ḳhaak par gir ke lahū kaun-o-makāñ tak pahuñchā

raushnī ban ke mah-o-kāhkashāñ tak pahuñchā

arsh-e-a.azam ke pare lauh-o-qalam se aage

karbalā se ye lahū jaane kahāñ tak pahuñchā

ye lahū ban ke jalā rāh-e-vafā meñ qindīl

kārvāñ marhala-e-azm-e-javāñ tak pahuñchā

tāzgī ban ke rag-e-lāla-o-gul meñ dauḌā

abr ban-ban ke bayābān-e-tapāñ tak pahuñchā

ye lahū chheḌ gayā silsila-e-dār-o-rasan

ye lahū aag kī sūrat rag-e-jāñ tak pahuñchā

jal ga.ī sham.a añdheroñ kā jigar chaak huā

ye lahū vaqt kī lahroñ pe jahāñ tak pahuñchā

inqilābāt kī tārīḳh kā unvāñ ban kar

ye lahū qatl-gah-e-asr-e-ravāñ tak pahuñchā

chārāgar aa.e bahut koī masīhā na huā

sīna-e-arz ke zaḳhmoñ kā mudāvā na huā

karbalā aaj bhī barpā hai ba-andāz-e-digar

dasht meñ raqs-e-shahīdāñ kā tamāsha na huā

band hai aaj bhī kitnoñ ke liye nahr-e-furāt

ma.arka koī ba-zāhir lab-e-dariyā na huā

zainabeñ apne gharoñ meñ haiñ ridā se mahrūm

dasht-o-kohsār meñ ḳhema kahīñ barpā na huā

raat piitī hī rahī chāñd-sitāroñ kā lahū

vaqt kī tiira fazāoñ meñ ujālā na huā

kaun sā vaqt hai phir ruuh kī bedārī kā

zaḳhm-e-ehsās agar aaj bhī taazā na huā

dil ko bedār kareñ ruuh ko bebāk kareñ

asr-e-hāzir ke yazīdoñ kī qabā chaak kareñ

ashk be-sūd rahe kisht-e-tamannā ke liye

ḳhūn-e-dil ḳhūn-e-jigar se ise namnāk kareñ

mauj-e-ḳhūñ ġhāza-e-ruḳhsār-e-umam hotī hai

aao ab vaqt kī āvāz kā idrāk kareñ

zer-e-mehrāb nahīñ hotī mohabbat kī namāz

sāya-e-dār meñ ik sajda-e-be-bāk kareñ

KHak par gir ke lahu kaun-o-makan tak pahuncha

raushni ban ke mah-o-kahkashan tak pahuncha

arsh-e-azam ke pare lauh-o-qalam se aage

karbala se ye lahu jaane kahan tak pahuncha

ye lahu ban ke jala rah-e-wafa mein qindil

karwan marhala-e-azm-e-jawan tak pahuncha

tazgi ban ke rag-e-lala-o-gul mein dauDa

abr ban-ban ke bayaban-e-tapan tak pahuncha

ye lahu chheD gaya silsila-e-dar-o-rasan

ye lahu aag ki surat rag-e-jaan tak pahuncha

jal gai shama andheron ka jigar chaak hua

ye lahu waqt ki lahron pe jahan tak pahuncha

inqilabaat ki tariKH ka unwan ban kar

ye lahu qatl-gah-e-asr-e-rawan tak pahuncha

chaaragar aae bahut koi masiha na hua

sina-e-arz ke zaKHmon ka mudawa na hua

karbala aaj bhi barpa hai ba-andaz-e-digar

dasht mein raqs-e-shahidan ka tamasha na hua

band hai aaj bhi kitnon ke liye nahr-e-furaat

marka koi ba-zahir lab-e-dariya na hua

zainaben apne gharon mein hain rida se mahrum

dasht-o-kohsar mein KHema kahin barpa na hua

raat piti hi rahi chand-sitaron ka lahu

waqt ki tera fazaon mein ujala na hua

kaun sa waqt hai phir ruh ki bedari ka

zaKHm-e-ehsas agar aaj bhi taza na hua

dil ko bedar karen ruh ko bebak karen

asr-e-hazir ke yazidon ki qaba chaak karen

ashk be-sud rahe kisht-e-tamanna ke liye

KHun-e-dil KHun-e-jigar se ise namnak karen

mauj-e-KHun ghaza-e-ruKHsar-e-umam hoti hai

aao ab waqt ki aawaz ka idrak karen

zer-e-mehrab nahin hoti mohabbat ki namaz

saya-e-dar mein ek sajda-e-be-bak karen