naya trend

larzā taarī hai

sarkārī daftaroñ se manzūr-shuda zindagī kā bharosa hī kyā hai

magar sifārshī kī jeb meñ safed

shanāḳhtī card dekh kar dil ko thoḌī tasallī to huī

siyāh chehre vaalā kam-az-kam

dhoka to safed-o-safed bechtā hai

yaqīnan ye ġhair fitrī 'amal hai

daftaroñ ke usuul to

chaprāsiyoñ ke muñh se Tapaktī raal se tahrīr hote haiñ

ye tahrīr-shuda narḳh-nāme

baa'z auqāt imlā kī aġhlāt ke saath hī

baḌe afsarān kī Tebaloñ ke nīche photocopy hote haiñ

aur photocopy kī qīmatoñ meñ radd-o-badal se

zindagī aur ḳhvāhish-e-zindagī ke

narḳh badalte haiñ

daftarī mu'āmalāt to aise hī chalte haiñ

ab yahāñ koī ye na samjhe ki

ye currency kā ek-tarfa kārobār

'adl-o-insāf kī burī ending hai

bhaa.ī sāhab ye trending hai

larza tari hai

sarkari daftaron se manzur-shuda zindagi ka bharosa hi kya hai

magar sifarshi ki jeb mein safed

shanaKHti card dekh kar dil ko thoDi tasalli to hui

siyah chehre wala kam-az-kam

dhoka to safed-o-safed bechta hai

yaqinan ye ghair fitri 'amal hai

daftaron ke usul to

chaprasiyon ke munh se Tapakti ral se tahrir hote hain

ye tahrir-shuda narKH-name

ba'z auqat imla ki aghlat ke sath hi

baDe afsaran ki Tebalon ke niche photocopy hote hain

aur photocopy ki qimaton mein radd-o-badal se

zindagi aur KHwahish-e-zindagi ke

narKH badalte hain

daftari mu'amalat to aise hi chalte hain

ab yahan koi ye na samjhe ki

ye currency ka ek-tarfa karobar

'adl-o-insaf ki buri ending hai

bhai sahab ye trending hai