nazm

aaj bahut se lafz jo rah ga.e the

aur vo ThiThurte hue harf

jin ko yakjā karnā ba-mushkil thā

kuchh jazbāt jo dil ke

dāman se lag kar sisak rahe the

sochoñ kā be-hañgam hujūm

jo dimāġh kī hudūd se musalsal Takrā rahā thā

ehsāsāt jin kī kokh meñ

udāsī bechārgī past ḳhālī ne janm liyā thā

un meñ ka.ī jazbe bhī the

jin kī daurān-e-hamal hī maut ho ga.ī

kuchh TukḌe bhī the siyāh-baḳhtī ke

kuchh rahzan bhī jo ḳhayālāt kī aabrū

luuT liyā karte the

aaj un rahzanoñ ko suulī par chaḌhā diyā gayā

insāf huā aur insāf ye huā ki

tum duur baiThe dekh rahī thī bahut ḳhāmoshī

aur dilchaspī kā mojid banā khel khel ke liye

aaj in sab lafzoñ harūfoñ ehsāsāt

jazbāt aur sochoñ ko

tere ḳhayāl se ġhusl diyā

araq-e-gulāb jo terī suujī āñkhoñ

se bah rahā thā

is araq ko lāshe par chhiḌakte hue

aaj unheñ dafnā diyā gayā

aaj bahut se lafz jo rah gae the

aur wo ThiThurte hue harf

jin ko yakja karna ba-mushkil tha

kuchh jazbaat jo dil ke

daman se lag kar sisak rahe the

sochon ka be-hangam hujum

jo dimagh ki hudud se musalsal Takra raha tha

ehsasat jin ki kokh mein

udasi bechaargi past KHali ne janm liya tha

un mein kai jazbe bhi the

jin ki dauran-e-hamal hi maut ho gai

kuchh TukDe bhi the siyah-baKHti ke

kuchh rahzan bhi jo KHayalat ki aabru

luT liya karte the

aaj un rahzanon ko suli par chaDha diya gaya

insaf hua aur insaf ye hua ki

tum dur baiThe dekh rahi thi bahut KHamoshi

aur dilchaspi ka mojid bana khel khel ke liye

aaj in sab lafzon harufon ehsasat

jazbaat aur sochon ko

tere KHayal se ghusl diya

araq-e-gulab jo teri suji aankhon

se bah raha tha

is araq ko lashe par chhiDakte hue

aaj unhen dafna diya gaya