nazm

samāñ badlā

havā badlī

siyāhī raat kī badlī

fazā meñ tairtī aur chīḳhtī bū-e-lahū badlī

jo gardish meñ haiñ taare

kyā zarā bhī in kī rau badlī

nahīñ badlī

tamāzat din kī badlī

yā udāsī shaam kī badlī

jhulastī dhuup badlī na sulagtī dopahar badlī

sabā kī tāzgī badlī

na ḳhushbū sahar kī badlī

duā badlī

azaañ badlī

ġharīboñ kī fuġhāñ badlī

amīroñ kī anā badlī

nahīñ badlī

na uupar āsmāñ badlā

na nīche ye zamīñ badlī

na zālim kī hañsī badlī

na mazlūmoñ kī bekas be-amāñ be-āsrā sī iltijā badlī

agar badlā to ik hindsa

nahīñ badlī to taqdīreñ

nahīñ badle to apne ḳhvāb

aur in ḳhvāboñ kī ta.abīreñ

aur in se munsalik apne dukhoñ kī dāstāñ

apne ġhamoñ kī dāstāñ

bilkul nahīñ badlī

to kyā badlā

saman badla

hawa badli

siyahi raat ki badli

faza mein tairti aur chiKHti bu-e-lahu badli

jo gardish mein hain tare

kya zara bhi in ki rau badli

nahin badli

tamazat din ki badli

ya udasi sham ki badli

jhulasti dhup badli na sulagti dopahar badli

saba ki tazgi badli

na KHushbu sahar ki badli

dua badli

azan badli

gharibon ki fughan badli

amiron ki ana badli

nahin badli

na upar aasman badla

na niche ye zamin badli

na zalim ki hansi badli

na mazlumon ki bekas be-aman be-asra si iltija badli

agar badla to ek hindsa

nahin badli to taqdiren

nahin badle to apne KHwab

aur in KHwabon ki tabiren

aur in se munsalik apne dukhon ki dastan

apne ghamon ki dastan

bilkul nahin badli

to kya badla