nazm

zindagī kī cigarette

tumhāre saath piine kī ḳhātir

maiñ nai apne sochne kī salāhiyat

tumhāre naam kar dī thī

aur vo tamām makhoTe

tumhāre kamre meñ sajā diye the

jinheñ tum nai umar bhar

shikār kiyā thā

maiñ apnī saarī ḳhushbueñ

ḳharch kar ke

tumhārā puurā dard ḳharīd rahī thī

lekin tum nai ā.ankhoñ par hī nahīñ

dimāġh par bhī paTTī bāñdh rakhī thī

saḌak hādse ke ba.ad

merā plastar chaḌhte samay

jo tum ne ek lamhe ko

apnī ā.ankhoñ kī paTTī khol dī thī

tumhārā sar jhuk gayā thā

mujhe ma.alūm thā maiñ tumheñ kho dūñgī

jo kho jaatā hai

us ke khone kā afsos gāñTh ban jaatā hai

maiñ agarche hil nahīñ saktī thī

sochne se mahrūm nahīñ thī

aur duniyā sochne se ibārat hai

merī āñkheñ suuj ga.ī thiiñ band nahīñ thiiñ

aur kānoñ meñ vo sab āvāzeñ aa rahī thiiñ

jab tum mere hāfize ke maflūj ho jaane kā elaan kar rahe the

maiñ dekh rahī thī

log tumhārī taraf mutavajjah hue the

lekin tumhāre dimāġh pe lagā.ī hui paTTī

sab ko nazar aa ga.ī thī

tum jaan lo ki duniyā sochne se ibārat hai

ab zindagī kī cigarette sirf maiñ piyūñgī

aur tum cigarette kī raakh kī tarah

merī uñgliyoñ se jhaḌte rahoge

zindagi ki cigarette

tumhaare sath pine ki KHatir

main nai apne sochne ki salahiyat

tumhaare nam kar di thi

aur wo tamam makhoTe

tumhaare kamre mein saja diye the

jinhen tum nai umar bhar

shikar kiya tha

main apni sari KHushbuen

KHarch kar ke

tumhaara pura dard KHarid rahi thi

lekin tum nai aaankhon par hi nahin

dimagh par bhi paTTi bandh rakhi thi

saDak hadse ke baad

mera plastar chaDhte samay

jo tum ne ek lamhe ko

apni aaankhon ki paTTi khol di thi

tumhaara sar jhuk gaya tha

mujhe malum tha main tumhein kho dungi

jo kho jata hai

us ke khone ka afsos ganTh ban jata hai

main agarche hil nahin sakti thi

sochne se mahrum nahin thi

aur duniya sochne se ibarat hai

meri aankhen suj gai thin band nahin thin

aur kanon mein wo sab aawazen aa rahi thin

jab tum mere hafize ke mafluj ho jaane ka elan kar rahe the

main dekh rahi thi

log tumhaari taraf mutawajjah hue the

lekin tumhaare dimagh pe lagai hui paTTi

sab ko nazar aa gai thi

tum jaan lo ki duniya sochne se ibarat hai

ab zindagi ki cigarette sirf main piyungi

aur tum cigarette ki rakh ki tarah

meri ungliyon se jhaDte rahoge