nazm

bahut dinoñ se

vo merī tauhīn ke bahāne

DhūñD rahā thā

be-lihāz be-muravvat

dūsroñ kī zillat

us ke jiine kā javāz

har ta.alluq ke tasme khol kar

pheñk denā

us kā mizāj

us kī āvāz kī yaḳh havā se

jaane kaun kaun zaḳhmī hai

merī ḳhāmoshī

us kī āvāz ko jitnī baar chhūtī

us kā julāpā aur baḌh jaatā

phir na kisī safar kī dhuup

na thakan masāfatoñ kī kaam aatī

kal vo kuchh ziyāda hī haañp rahā thā

us kī yaḳh āvāz ke nashtar

merī ḳhāmoshī par lage

vo TuuT ga.ī

daf.atan

merī uñgliyāñ

billī ke panjoñ jaisī ho ga.iiñ

yaad nahīñ

maiñ us par jhapTī yā ḳhud par

abhī maiñ ne ā.īna nahīñ dekhā

bahut dinon se

wo meri tauhin ke bahane

DhunD raha tha

be-lihaz be-murawwat

dusron ki zillat

us ke jine ka jawaz

har talluq ke tasme khol kar

phenk dena

us ka mizaj

us ki aawaz ki yaKH hawa se

jaane kaun kaun zaKHmi hai

meri KHamoshi

us ki aawaz ko jitni bar chhuti

us ka julapa aur baDh jata

phir na kisi safar ki dhup

na thakan masafaton ki kaam aati

kal wo kuchh ziyaada hi hanp raha tha

us ki yaKH aawaz ke nashtar

meri KHamoshi par lage

wo TuT gai

dafatan

meri ungliyan

billi ke panjon jaisi ho gain

yaad nahin

main us par jhapTi ya KHud par

abhi main ne aaina nahin dekha