nind jangal

nīñd-pālkī utrī raat duur jangal meñ

ḳhvāb ḳhvāb manzar thā dhīre dhīre bahtī thī

symphony havāoñ kī raat chāñd bādal meñ

kaale pairahan pahne bā-vaqār peḌoñ ne violin sañbhāle the

mast ho ke jab patte tāliyāñ bajāte the

soī jaagī beloñ par phuul kasmasāte the

jugnūoñ kī jhilmil se rāj-hans sote se jaag jaag uThe the

āhaTeñ parindoñ kī apne shab-baseroñ meñ pā.eleñ bajātī thiiñ

chāñdnī kī bāñhoñ meñ jhiil raqs kartī thī

dhīmī dhīmī sī ḳhushbū saath saath chaltī thī

sab ġhazāl jangal ke be-ḳhudī ke aalam meñ

symphony kī lahroñ par ballet raqs karte the

hirniyoñ kī āñkhoñ meñ mushk sī mahaktī thī

sub.h band kamre meñ shahr kī kasāfat se muzmahil sā sūraj

jab ek aur na.e din kī dhuul le ke aaya thā

T v vaale kamre meñ sub.h kā ḳhabar-nāma ittilā.a detā thā

ek aur jangal ko kaaT kar nikāleñge rāsta taraqqī kā

nind-palki utri raat dur jangal mein

KHwab KHwab manzar tha dhire dhire bahti thi

symphony hawaon ki raat chand baadal mein

kale pairahan pahne ba-waqar peDon ne wiolin sanbhaale the

mast ho ke jab patte taliyan bajate the

soi jagi belon par phul kasmasate the

jugnuon ki jhilmil se raj-hans sote se jag jag uThe the

aahaTen parindon ki apne shab-baseron mein paelen bajati thin

chandni ki banhon mein jhil raqs karti thi

dhimi dhimi si KHushbu sath sath chalti thi

sab ghazal jangal ke be-KHudi ke aalam mein

symphony ki lahron par ballet raqs karte the

hirniyon ki aankhon mein mushk si mahakti thi

subh band kamre mein shahr ki kasafat se muzmahil sa suraj

jab ek aur nae din ki dhul le ke aaya tha

T w wale kamre mein subh ka KHabar-nama ittilaa deta tha

ek aur jangal ko kaT kar nikalenge rasta taraqqi ka