nishan aur bhi hain

mohabbat ke rāz-e-nihāñ aur bhī haiñ

fasāne pas-e-dāstāñ aur bhī haiñ

tujhe dard-e-dil meñ chhupā.ūñ to kaise

mire haal ke tarjumāñ aur bhī haiñ

tirī bazm se to hai ḳhalvat hī behtar

yahāñ maiñ huuñ tū hai vahāñ aur bhī haiñ

kahāñ hai hadeñ ālam-e-rang-o-bū kī

yahī ik nahīñ gulsitāñ aur bhī haiñ

zarā kah to dete bulāne se pahle

ki is bazm meñ mehmāñ aur bhī haiñ

tū maqsūd par rāh-rau ruk na jaanā

ki manzil se aage nishāñ aur bhī haiñ

idhar bhī nazar tarkash-o-tīr vaale

tire bismil-e-nīm-jāñ aur bhī haiñ

jahāñ kho gayā hosh un manziloñ meñ

junūñ ke abhī kārvāñ aur bhī haiñ

salāmat jabīñ shauq-e-sajda salāmat

haram ke sivā āstāñ aur bhī haiñ

ye suniye salāsil kī jhankār suniye

junūñ meñ mire ham-zabāñ aur bhī haiñ

mubārak tujhe barq-e-ātish-mizājī

mirā dam hai to āshiyāñ aur bhī haiñ

mohabbat ke raaz-e-nihan aur bhi hain

fasane pas-e-dastan aur bhi hain

tujhe dard-e-dil mein chhupaun to kaise

mere haal ke tarjuman aur bhi hain

teri bazm se to hai KHalwat hi behtar

yahan main hun tu hai wahan aur bhi hain

kahan hai haden aalam-e-rang-o-bu ki

yahi ek nahin gulsitan aur bhi hain

zara kah to dete bulane se pahle

ki is bazm mein mehman aur bhi hain

tu maqsud par rah-rau ruk na jaana

ki manzil se aage nishan aur bhi hain

idhar bhi nazar tarkash-o-tir wale

tere bismil-e-nim-jaan aur bhi hain

jahan kho gaya hosh un manzilon mein

junun ke abhi karwan aur bhi hain

salamat jabin shauq-e-sajda salamat

haram ke siwa aastan aur bhi hain

ye suniye salasil ki jhankar suniye

junun mein mere ham-zaban aur bhi hain

mubarak tujhe barq-e-atish-mizaji

mera dam hai to aashiyan aur bhi hain