nizam-e-zist

nizām-e-zīst kisī taal kā nahīñ paanī

jo sang-basta sā Thahrā huā muqayyad hai

har aañkh dekh sake jis kī itnī bas had hai

kare na kuchh bhī jo paidā diloñ meñ hairānī

nizām-e-zīst kisī taal kā nahīñ paanī

nizām-e-zīst hai lekin vo be-karāñ paanī

pahāḌiyoñ se jo niklā ho ban ke mastāna

kisī kī ārzū-e-vasl kā ho dīvāna

yahāñ se duur bahut duur kohsāroñ meñ

darāz rāhoñ meñ dushvār rahguzāroñ meñ

vahīñ jahāñ ye sileñ barf kī pighaltī haiñ

jahāñ ubalte haiñ chashme havā.eñ chaltī haiñ

vahīñ se to ye nadī naale bahte aate haiñ

jo pattharoñ ko chaTānoñ ko chiir jaate haiñ

chaTTāneñ kaaT ke jaate haiñ ye jidhar jaa.eñ

nikal ke koh se maidāñ se ye guzar jaa.eñ

ye ham-kanār hue aur baḌh gayā paanī

har ek samt ko phir kheltā chalā paanī

ye jangaloñ meñ guzartā to ghāTiyoñ meñ kabhī

ye phailtā kabhī maidāñ meñ vādiyoñ meñ kabhī

huī hai jis se bashar kī nazar ko hairānī

nizām-e-zīst hai goyā vo be-karāñ paanī

nizam-e-zist kisi tal ka nahin pani

jo sang-basta sa Thahra hua muqayyad hai

har aankh dekh sake jis ki itni bas had hai

kare na kuchh bhi jo paida dilon mein hairani

nizam-e-zist kisi tal ka nahin pani

nizam-e-zist hai lekin wo be-karan pani

pahaDiyon se jo nikla ho ban ke mastana

kisi ki aarzu-e-wasl ka ho diwana

yahan se dur bahut dur kohsaron mein

daraaz rahon mein dushwar rahguzaron mein

wahin jahan ye silen barf ki pighalti hain

jahan ubalte hain chashme hawaen chalti hain

wahin se to ye nadi nale bahte aate hain

jo pattharon ko chaTanon ko chir jate hain

chaTTanen kaT ke jate hain ye jidhar jaen

nikal ke koh se maidan se ye guzar jaen

ye ham-kanar hue aur baDh gaya pani

har ek samt ko phir khelta chala pani

ye jangalon mein guzarta to ghaTiyon mein kabhi

ye phailta kabhi maidan mein wadiyon mein kabhi

hui hai jis se bashar ki nazar ko hairani

nizam-e-zist hai goya wo be-karan pani