nuqush

kachchī dīvār se girtī huī miTTī kī tarah

kaañp kaañp uThtā hai barbād-e-mohabbat kā vajūd

hasrateñ suut ke dhāgoñ kī tarah nāzuk haiñ

dard kī kauḌiyāñ kis tarah bañdheñgī in meñ

kaun ghuTnoñ meñ liye sar ko akelā tanhā

roz rotā hai murādoñ ke hasīñ manDap meñ

kitnī vīrān hai ujḌe hue ḳhvāboñ kī muñDer

bhūlī-bisrī huī yādoñ ke papīhe chup haiñ

haa.e kyā shaam thī vo shaam vo dehāt kī shaam

merī ā.ankhoñ meñ dhanak jhuul ga.ī panghaT par

aur jab jhuum ke alġhūza uThāyā maiñ ne

chāñdnī apnā ghaḌā bhuul ga.ī panghaT par

niiñd ke nashshe meñ lahrāne lagīñ maTiyāreñ

apnī hī bāñhoñ meñ bil khāne lagīñ maTiyārīñ

mere alġhūze kī har taan se pighlā tirā ruup

mere har giit se barsī kabhī chhāñv kabhī dhuup

kaun barsoñ kī bujhī raakh kurede ai dost

gaañv se duur kisī ajnabī rah-rav kī tarah

shab kī tanhā.ī ke jañgal meñ ghirā baiThā huuñ

dil meñ zaḳhmoñ ke sulagte hue kuchh naqsh liye

ek dhundlā sā tasavvur hai kisī sapne kā

varna har lamha-e-sayyāl mujhe yaad nahīñ

terī sūrat to bahut der huī bhuul ga.ī

ab to apne bhī ḳhat-o-ḳhāl mujhe yaad nahīñ

kachchi diwar se girti hui miTTi ki tarah

kanp kanp uThta hai barbaad-e-mohabbat ka wajud

hasraten sut ke dhagon ki tarah nazuk hain

dard ki kauDiyan kis tarah bandhengi in mein

kaun ghuTnon mein liye sar ko akela tanha

roz rota hai muradon ke hasin manDap mein

kitni viran hai ujDe hue KHwabon ki munDer

bhuli-bisri hui yaadon ke papihe chup hain

hae kya sham thi wo sham wo dehat ki sham

meri aaankhon mein dhanak jhul gai panghaT par

aur jab jhum ke alghuza uThaya main ne

chandni apna ghaDa bhul gai panghaT par

nind ke nashshe mein lahrane lagin maTiyaren

apni hi banhon mein bil khane lagin maTiyarin

mere alghuze ki har tan se pighla tera rup

mere har git se barsi kabhi chhanw kabhi dhup

kaun barson ki bujhi rakh kurede ai dost

ganw se dur kisi ajnabi rah-raw ki tarah

shab ki tanhai ke jangal mein ghira baiTha hun

dil mein zaKHmon ke sulagte hue kuchh naqsh liye

ek dhundla sa tasawwur hai kisi sapne ka

warna har lamha-e-sayyal mujhe yaad nahin

teri surat to bahut der hui bhul gai

ab to apne bhi KHat-o-KHal mujhe yaad nahin