nur-jahan ke mazar par

pahlu-e-shāh meñ ye duḳhtar-e-jamhūr kī qabr

kitne gum-gashta fasānoñ kā pata detī hai

kitne ḳhūñ-rez haqā.eq se uThātī hai naqāb

kitnī kuchlī huī jānoñ kā pata detī hai

kaise maġhrūr shahanshāhoñ kī taskīñ ke liye

sāl-hā-sāl hasīnāoñ ke bāzār lage

kaise bahkī huī nazroñ ke ta.ayyush ke liye

surḳh mahloñ meñ javāñ jismoñ ke ambār lage

kaise har shāḳh se muñh-band mahaktī kaliyāñ

noch lī jaatī thiiñ taz.īn-e-haram kī ḳhātir

aur murjhā ke bhī āzād na ho saktī thiiñ

zill-e-subhān kī ulfat ke bharam kī ḳhātir

kaise ik fard ke hoñToñ kī zarā sī jumbish

sard kar saktī thī be-laus vafāoñ ke charāġh

luuT saktī thī damakte hue hāthoñ kā suhāg

toḌ saktī thī mai-e-ishq se labrez ayāġh

sahmī sahmī sī fazāoñ meñ ye vīrāñ marqad

itnā ḳhāmosh hai fariyād-kunāñ ho jaise

sard shāḳhoñ meñ havā chīḳh rahī hai aaise

rūh-e-taqdīs-o-vafā marsiyāñ-ḳhvāñ ho jaise

tū mirī jaan mujhe hairat o hasrat se na dekh

ham meñ koī bhī jahāñ-nūr o jahāñ-gīr nahīñ

tū mujhe chhoḌ ke Thukrā ke bhī jā saktī hai

tere hāthoñ meñ mire haath haiñ zanjīr nahīñ

pahlu-e-shah mein ye duKHtar-e-jamhur ki qabr

kitne gum-gashta fasanon ka pata deti hai

kitne KHun-rez haqaeq se uThati hai naqab

kitni kuchli hui jaanon ka pata deti hai

kaise maghrur shahanshahon ki taskin ke liye

sal-ha-sal hasinaon ke bazar lage

kaise bahki hui nazron ke tayyush ke liye

surKH mahlon mein jawan jismon ke ambar lage

kaise har shaKH se munh-band mahakti kaliyan

noch li jati thin tazin-e-haram ki KHatir

aur murjha ke bhi aazad na ho sakti thin

zill-e-subhan ki ulfat ke bharam ki KHatir

kaise ek fard ke honTon ki zara si jumbish

sard kar sakti thi be-laus wafaon ke charagh

luT sakti thi damakte hue hathon ka suhag

toD sakti thi mai-e-ishq se labrez ayagh

sahmi sahmi si fazaon mein ye viran marqad

itna KHamosh hai fariyaad-kunan ho jaise

sard shaKHon mein hawa chiKH rahi hai aaise

ruh-e-taqdis-o-wafa marsiyan-KHwan ho jaise

tu meri jaan mujhe hairat o hasrat se na dekh

hum mein koi bhi jahan-nur o jahan-gir nahin

tu mujhe chhoD ke Thukra ke bhi ja sakti hai

tere hathon mein mere hath hain zanjir nahin