nur ka bosa

mire nadīm

maiñ hairān sochtī thī yahī

ki ye badaltī huī rut

ye sard sard havā

tumhārā saath na hotā to kaisī chaltī bhalā

nazar tilism-e-tamannā se jagmagātī huī

hamāre haath the ik dūsre ke hāthoñ meñ

bahut se va.ade

mohabbat ke saikḌoñ qisse

sunā rahe the ham ik dūsre ko chalte meñ

kahīñ kahīñ pe zamāna bhī raah meñ haa.il

hamārī ḳhalvat-ḳhāna meñ sar uThā.e hue

magar hameñ to bas ik dūsre se matlab thā

havā kī narm-ravī bhī to bojh lagtī thī

vo sub.h-e-nūr kā bosa tirī nigāhoñ se

bahut se ḳhvāb the bistar kī silvaToñ meñ chhupe

jinheñ batāne se ziyāda chhupānā paḌ gayā thā

ham apnī zaat ke ḳhalvat-kade meñ mahv-e-safar

thā sub.h-o-shām yahī kaam ho nazar pe nazar

phir aisā lamha bhī aayā

ki vaqt ke hāthoñ

click kiyā jo baTan

scrēn ġhā.eb thī

jale bujhe se sitāroñ ke tarah harf ubhre

na ab vo haath na va.ade na nuur ke bose

likhā thā itnā ki network munqata.a huā hai

mere nadim

main hairan sochti thi yahi

ki ye badalti hui rut

ye sard sard hawa

tumhaara sath na hota to kaisi chalti bhala

nazar tilism-e-tamanna se jagmagati hui

hamare hath the ek dusre ke hathon mein

bahut se wade

mohabbat ke saikDon qisse

suna rahe the hum ek dusre ko chalte mein

kahin kahin pe zamana bhi rah mein hail

hamari KHalwat-KHana mein sar uThae hue

magar hamein to bas ek dusre se matlab tha

hawa ki narm-rawi bhi to bojh lagti thi

wo subh-e-nur ka bosa teri nigahon se

bahut se KHwab the bistar ki silwaTon mein chhupe

jinhen batane se ziyaada chhupana paD gaya tha

hum apni zat ke KHalwat-kade mein mahw-e-safar

tha subh-o-sham yahi kaam ho nazar pe nazar

phir aisa lamha bhi aaya

ki waqt ke hathon

click kiya jo baTan

screen ghaeb thi

jale bujhe se sitaron ke tarah harf ubhre

na ab wo hath na wade na nur ke bose

likha tha itna ki network munqata hua hai