panch parchhaiyan

aaj barā-e-fātiha shaam ko jo uThā.e haath

sūrateñ kuchh jhalak paḌīñ āñsūoñ kī taḌap ke saath

uf vo barādar-e-saġhīr sahn meñ kheltā huā

gard-o-ġhubār se tamām gorā badan aTā huā

haa.e rī bad-nasīb shaam ghar se vo jab ḳhafā huā

hichkiyāñ aa.iiñ dam ghuTā ḳhātma ziist kā huā

aaj barā-e-fātiha shaam ko jo uThā.e haath

sūrateñ kuchh jhalak paḌīñ āñsūoñ kī taḌap ke saath

ḳhushk vo chehra-e-pidar jism nahīf-o-nā-tavāñ

haath meñ ra.asha kā numūd zard jabīñ pe jhurriyāñ

nūr-e-taqaddus-o-jalāl rīsh-e-safed se ayaañ

ziist kī thartharāhaTeñ sham-e-sahar kī dāstāñ

aaj barā-e-fātiha shaam ko jo uThā.e haath

sūrateñ kuchh jhalak paḌīñ āñsūoñ kī taḌap ke saath

haa.e vo mādar-e-hazīñ aañkh ke dard se niDhāl

phir vahī dukh-bharī karāh kar ga.ī dil ko pā.emāl

vaqt se pahle kaT gayā zindagī kā sunahrā jaal

shaam se qabl ho gayā mehr-e-hayāt kā zavāl

aaj barā-e-fātiha shaam ko jo uThā.e haath

sūrateñ kuchh jhalak paḌīñ āñsūoñ kī taḌap ke saath

shakl nazar meñ phir ga.ī duḳhtar-e-shīr-ḳhār kī

haa.e vo ruḳh gulāb sā uf vo hañsī bahār kī

māya-e-sad-nashāt thī jo dil-e-be-qarār kī

jhūltī hai vo jhūlnā god meñ ab mazār kī

aaj barā-e-fātiha shaam ko jo uThā.e haath

sūrateñ kuchh jhalak paḌīñ āñsūoñ kī taḌap ke saath

haa.e vo māhtāb sā rū-e-rafīqa-e-hayāt

āñkhoñ meñ khīñch ke aa ga.ī saarī hasīn kā.enāt

yaad pe naqsh ho ga.ī guzrī huī har ek baat

haa.e shabāb kī vo maut uf rī judā.ī kī vo raat

aaj barā-e-fātiha shaam ko jo uThā.e haath

sūrateñ kuchh jhalak paḌīñ āñsūoñ kī taḌap ke saath

aaj bara-e-fatiha sham ko jo uThae hath

suraten kuchh jhalak paDin aansuon ki taDap ke sath

uf wo baradar-e-saghir sahn mein khelta hua

gard-o-ghubar se tamam gora badan aTa hua

hae ri bad-nasib sham ghar se wo jab KHafa hua

hichkiyan aain dam ghuTa KHatma zist ka hua

aaj bara-e-fatiha sham ko jo uThae hath

suraten kuchh jhalak paDin aansuon ki taDap ke sath

KHushk wo chehra-e-pidar jism nahif-o-na-tawan

hath mein rasha ka numud zard jabin pe jhurriyan

nur-e-taqaddus-o-jalal rish-e-safed se ayan

zist ki thartharahaTen sham-e-sahar ki dastan

aaj bara-e-fatiha sham ko jo uThae hath

suraten kuchh jhalak paDin aansuon ki taDap ke sath

hae wo madar-e-hazin aankh ke dard se niDhaal

phir wahi dukh-bhari karah kar gai dil ko paemal

waqt se pahle kaT gaya zindagi ka sunahra jal

sham se qabl ho gaya mehr-e-hayat ka zawal

aaj bara-e-fatiha sham ko jo uThae hath

suraten kuchh jhalak paDin aansuon ki taDap ke sath

shakl nazar mein phir gai duKHtar-e-shir-KHar ki

hae wo ruKH gulab sa uf wo hansi bahaar ki

maya-e-sad-nashat thi jo dil-e-be-qarar ki

jhulti hai wo jhulna god mein ab mazar ki

aaj bara-e-fatiha sham ko jo uThae hath

suraten kuchh jhalak paDin aansuon ki taDap ke sath

hae wo mahtab sa ru-e-rafiqa-e-hayat

aankhon mein khinch ke aa gai sari hasin kaenat

yaad pe naqsh ho gai guzri hui har ek baat

hae shabab ki wo maut uf ri judai ki wo raat

aaj bara-e-fatiha sham ko jo uThae hath

suraten kuchh jhalak paDin aansuon ki taDap ke sath