pahaDon par main nange panw chalna chahti hun

hudūd-e-shahr se bāhar

kaḌaktī dhuup meñ chatiyal pahāḌoñ par

maiñ nange paañv chalnā chāhtī huuñ mujhe mahsūs hotā hai

havā sahrā meñ tanhā.ī kā nauha paḌh rahī hai chaTānoñ ke badan

mere gulābī narm talvoñ se kuchal jaane kī hasrat meñ sulagte haiñ

dahakte pattharoñ ke hoñT

merī uñgliyoñ ke lams kī chāhat meñ jalte haiñ

kisī zī-rūh ke qadmoñ kī aahaT ko tarastī ye chaTāneñ

jaane kab se muntazir haiñ un kī jo dukh baañT lete haiñ

qarīb aate haiñ

duurī kī ḳhalījeñ paaT lete haiñ

maiñ un se jā milūñgī aur sargoshī karūñgī

suno maiñ bhī dukhī huuñ farq bas ye hai

tumheñ tanhā.ī kā ġham hai mujhe logoñ se mil kar dukh mile haiñ

suno tanhā.ī be-shak jāñ-gusil hai dushman-e-dil hai

magar tanhā.ī meñ phir bhī amaañ hai ye dukh kaisā hī gahrā kyoñ na ho

phir bhī rag-e-jāñ se qarīb aa.e hue

logoñ ke baḳhshinda dukhoñ se kam hī hogā

kam hī hotā hai use sahnā bahut mushkil sahī mumkin to hotā hai

hudud-e-shahr se bahar

kaDakti dhup mein chatiyal pahaDon par

main nange panw chalna chahti hun mujhe mahsus hota hai

hawa sahra mein tanhai ka nauha paDh rahi hai chaTanon ke badan

mere gulabi narm talwon se kuchal jaane ki hasrat mein sulagte hain

dahakte pattharon ke honT

meri ungliyon ke lams ki chahat mein jalte hain

kisi zi-ruh ke qadmon ki aahaT ko tarasti ye chaTanen

jaane kab se muntazir hain un ki jo dukh banT lete hain

qarib aate hain

duri ki KHalijen paT lete hain

main un se ja milungi aur sargoshi karungi

suno main bhi dukhi hun farq bas ye hai

tumhein tanhai ka gham hai mujhe logon se mil kar dukh mile hain

suno tanhai be-shak jaan-gusil hai dushman-e-dil hai

magar tanhai mein phir bhi aman hai ye dukh kaisa hi gahra kyon na ho

phir bhi rag-e-jaan se qarib aae hue

logon ke baKHshinda dukhon se kam hi hoga

kam hi hota hai use sahna bahut mushkil sahi mumkin to hota hai