pahli nazar

haa.e vo pahlī nazar vo us kī āñkhoñ ke payām

vo lajā kar muskurā kar dast-e-nāzuk se salām

har nazar meñ mai-kade ġhaltāñ vo chanchal bāñkpan

rang-e-gulshan bhī tasadduq yuuñ sarāpā gul-badan

sar pe jhūmar paañv meñ pāzeb ik zohra-ḳhisāl

aur mujassam kahkashāñ us ke dupaTTe kā jamāl

barq kī tasvīr-e-kul shānoñ pe larzāñ choTiyāñ

marmarīñ hāthoñ meñ apnī dhun meñ gaatī chūḌiyāñ

kaan meñ bunde sarāpā āftab-o-māhtāb

parda-dārī kyā kahūñ ruḳh par tajallī kī naqāb

chaal meñ aahū kī shoḳhī chaal meñ badmastiyāñ

har qadam par inqalāb-e-dahr kī rangīniyāñ

har takallum ik qayāmat har tabassum barq-rez

aur jis kī sādgī bhī ik fasāna hashr-ḳhez

bā-takalluf bā-adab sad-nāz vo jannat-badosh

ek din aa.ī mirī pursish ko vo nik.hat-farosh

āñkhoñ āñkhoñ meñ diyā paiġhām-e-ishq-o-be-ḳhudī

zindagānī ik sharāb-e-tund ban kar rah ga.ī

thī vo duzdīda nigāh-e-dil-sitāñ mere liye

aa gayā thā mere ghar hī gulsitāñ mere liye

jaise mil jaa.e ḳhudā.ī is tarah masrūr thā

ghar kī raunaq kyā kahūñ us vaqt kā ik tuur thā

vo tahayyur-ḳhez vo kāfir nazāre al-amāñ

shauq-e-mohkam al-amāñ mub.ham ishāre al-amāñ

merī jānib dekh kar hañs hañs ke sharmātī rahī

nik.hat-e-gesū se ik ik saañs mahkātī rahī

nīchī nazroñ se vo kuchh kahnā ba-unvān-e-hayā

aap kab tashrīf lā.eñge ye us kī iltijā

kyā kahūñ kaise kahūñ rah rah ke ye sochā kiyā

jab na kuchh bhī ban paḌā to dard meñ Duubā kiyā

yaas se uTThī nazar aañsū bahā kar rah ga.ī

aur zabān-e-hāl āḳhir laḌkhaḌā kar rah ga.ī

al-ġharaz hone lagī ruḳhsat vo jān-e-ārzū

ashk barsāne lagā āḳhir jahān-e-ārzū

us kā jaanā thā ki vīrāñ ho ga.ī merī nazar

le ga.ī hamrāh apne raunaq-e-dīvār-o-dar

kis qadar rangīn thī fitrat kī naqqāshī na pūchh

shoḳhiyāñ kartī huī tāroñ kī shahzādī na pūchh

hae wo pahli nazar wo us ki aankhon ke payam

wo laja kar muskura kar dast-e-nazuk se salam

har nazar mein mai-kade ghaltan wo chanchal bankpan

rang-e-gulshan bhi tasadduq yun sarapa gul-badan

sar pe jhumar panw mein pazeb ek zohra-KHisal

aur mujassam kahkashan us ke dupaTTe ka jamal

barq ki taswir-e-kul shanon pe larzan choTiyan

marmarin hathon mein apni dhun mein gati chuDiyan

kan mein bunde sarapa aaftab-o-mahtab

parda-dari kya kahun ruKH par tajalli ki naqab

chaal mein aahu ki shoKHi chaal mein badmastiyan

har qadam par inqalab-e-dahr ki ranginiyan

har takallum ek qayamat har tabassum barq-rez

aur jis ki sadgi bhi ek fasana hashr-KHez

ba-takalluf ba-adab sad-naz wo jannat-badosh

ek din aai meri pursish ko wo nikhat-farosh

aankhon aankhon mein diya paigham-e-ishq-o-be-KHudi

zindagani ek sharab-e-tund ban kar rah gai

thi wo duzdida nigah-e-dil-sitan mere liye

aa gaya tha mere ghar hi gulsitan mere liye

jaise mil jae KHudai is tarah masrur tha

ghar ki raunaq kya kahun us waqt ka ek tur tha

wo tahayyur-KHez wo kafir nazare al-aman

shauq-e-mohkam al-aman mubham ishaare al-aman

meri jaanib dekh kar hans hans ke sharmati rahi

nikhat-e-gesu se ek ek sans mahkati rahi

nichi nazron se wo kuchh kahna ba-unwan-e-haya

aap kab tashrif laenge ye us ki iltija

kya kahun kaise kahun rah rah ke ye socha kiya

jab na kuchh bhi ban paDa to dard mein Duba kiya

yas se uTThi nazar aansu baha kar rah gai

aur zaban-e-haal aaKHir laDkhaDa kar rah gai

al-gharaz hone lagi ruKHsat wo jaan-e-arzu

ashk barsane laga aaKHir jahan-e-arzu

us ka jaana tha ki viran ho gai meri nazar

le gai hamrah apne raunaq-e-diwar-o-dar

kis qadar rangin thi fitrat ki naqqashi na puchh

shoKHiyan karti hui taron ki shahzadi na puchh