paigham-e-mohabbat

paiġhām-e-mohabbat pe qalam ham ne uThāyā

sadbhāvnā kā pahlā qadam ham ne uThāyā

masjid ke banāne meñ rahā haath hamārā

mandir meñ sajāne ko sanam ham ne uThāyā

kuchh farq nahīñ samjhā kisī diin dharm meñ

har qaum ke maz.hab kā alam ham ne uThāyā

qur.āñ liyā hāthoñ meñ sanam ham ne uThāyā

tab jā ke sar-e-dair-o-haram ham ne uThāyā

ghul paa.e na nafrat kā yahāñ zahr fazā meñ

phailā huā har dām-e-sitam ham ne uThāyā

is koshish-e-paiham meñ ka.ī zaḳhm lage haiñ

zāhir na kiyā us kā bharam ham ne uThāyā

duniyā kā har ik zulm-o-sitam ham ne uThāyā

hañs-hañs har ik ranj-o-alam ham ne uThāyā

insān ab insāñ kā lahū chaaT na paa.e

is ke liye mazbūt qadam ham ne uThāyā

khaa.ī jo qasam ham ne kabhī TuuT na paa.ī

ye bojh bhī allāh qasam ham ne uThāyā

az-bas-ki ziyāda ho yā kam ham ne uThāyā

rotī huī har aañkh kā nam ham ne uThāyā

holī meñ huī ḳhuun kī holī to huā dukh

toḌī ga.ī masjid bhī to ġham ham ne uThāyā

rahnā hai to ham aise raheñ pyaar se 'ahsan'

kahnā na paḌe bār-e-sitam ham ne uThāyā

paigham-e-mohabbat pe qalam hum ne uThaya

sadbhawna ka pahla qadam hum ne uThaya

masjid ke banane mein raha hath hamara

mandir mein sajaane ko sanam hum ne uThaya

kuchh farq nahin samjha kisi din dharm mein

har qaum ke mazhab ka alam hum ne uThaya

quran liya hathon mein sanam hum ne uThaya

tab ja ke sar-e-dair-o-haram hum ne uThaya

ghul pae na nafrat ka yahan zahr faza mein

phaila hua har dam-e-sitam hum ne uThaya

is koshish-e-paiham mein kai zaKHm lage hain

zahir na kiya us ka bharam hum ne uThaya

duniya ka har ek zulm-o-sitam hum ne uThaya

hans-hans har ek ranj-o-alam hum ne uThaya

insan ab insan ka lahu chaT na pae

is ke liye mazbut qadam hum ne uThaya

khai jo qasam hum ne kabhi TuT na pai

ye bojh bhi allah qasam hum ne uThaya

az-bas-ki ziyaada ho ya kam hum ne uThaya

roti hui har aankh ka nam hum ne uThaya

holi mein hui KHun ki holi to hua dukh

toDi gai masjid bhi to gham hum ne uThaya

rahna hai to hum aise rahen pyar se 'ahsan'

kahna na paDe bar-e-sitam hum ne uThaya