panghaT

dosh par gāgar uThā.e naaz farmātī huī

aa rahī hai aaj vo panghaT pe kuchh gaatī huī

baj rahī haiñ ghaaT par phir husn kī shahnā.iyāñ

vajd kartī hai zamīñ mad.hosh sā hai āsmāñ

apnī apnī gāgaroñ ko bhar rahī haiñ deviyāñ

ye fazā-e-shām hai yā koī naġhmoñ kā jahāñ

gungunātī muskurātī kaif barsātī huī

saarī duniyā jhūmtī saarī fazā gaatī huī

kyoñ mujhe hotā hai ehsās-e-tabāhī kyā karūñ

ik ḳhalish sī hai mire dil meñ ilāhī kyā karūñ

is qadar āḳhir tabī.at aaj ghabrātī hai kyoñ

kuchh nahīñ khultā ki dil meñ baat ye aatī hai kyoñ

apne dil kī baat thī is ko miTā saktā nahīñ

uf re mahrūmī ishāre se bulā saktā nahīñ

mast āñkhoñ se shabāb-e-rūh barsātī huī

jā rahī hai vo mire armāñ ko Thukrātī hoī

dosh par gagar uThae naz farmati hui

aa rahi hai aaj wo panghaT pe kuchh gati hui

baj rahi hain ghaT par phir husn ki shahnaiyan

wajd karti hai zamin madhosh sa hai aasman

apni apni gagaron ko bhar rahi hain dewiyan

ye faza-e-sham hai ya koi naghmon ka jahan

gungunati muskuraati kaif barsati hui

sari duniya jhumti sari faza gati hui

kyon mujhe hota hai ehsas-e-tabahi kya karun

ek KHalish si hai mere dil mein ilahi kya karun

is qadar aaKHir tabiat aaj ghabraati hai kyon

kuchh nahin khulta ki dil mein baat ye aati hai kyon

apne dil ki baat thi is ko miTa sakta nahin

uf re mahrumi ishaare se bula sakta nahin

mast aankhon se shabab-e-ruh barsati hui

ja rahi hai wo mere arman ko Thukraati hoi