parinde fikrmand hain

parinde amn-o-āshatī kī justujū meñ

pāra-pāra abr kī tarah

ravāñ

kabhī yahāñ kabhī vahāñ

bhaTak rahe haiñ chār-sū

vo ġharb ho ki sharq ho

shumāl yā junūb ho

kahīñ to koī gosha 'āfiyat kā ho

jahāñ sukūñ se

kuchh dinoñ qiyām kar sakeñ

magar sukūn

vahm yā ḳhayāl kī misāl hai

zarā sī āb-jū nadī

ki lā-hudūd bahr ho

tamām ek sail-e-surḳh maujzan

tamām āb-zār haiñ lahū-lahū

had-e-nigāh tak samāñ

dhuāñ dhuāñ

havā meñ hai rachī-basī

'ajab sī bū

ki jaise

un ke anginat 'azīz jo the par-fishāñ

aniis jo the naġhma-zan

rafīq jo the mahv-e-shauq

abhī abhī vo yak-ba-yak

jal-bujhe hoñ tābkār lahr se

ḳhalīfa-e-zamīñ ke Dhaa.e qahr se

rutoñ kī nā-muvāfaqat

fazā kī nā-munāsibat

parindoñ kī muhājrat

hai nuqta-e-urūj par

vo aane vaalī nasl ke liye bhī fikrmand haiñ

parinde amn-o-ashati ki justuju mein

para-para abr ki tarah

rawan

kabhi yahan kabhi wahan

bhaTak rahe hain chaar-su

wo gharb ho ki sharq ho

shumal ya junub ho

kahin to koi gosha 'afiyat ka ho

jahan sukun se

kuchh dinon qiyam kar saken

magar sukun

wahm ya KHayal ki misal hai

zara si aab-ju nadi

ki la-hudud bahr ho

tamam ek sail-e-surKH maujzan

tamam aab-zar hain lahu-lahu

had-e-nigah tak saman

dhuan dhuan

hawa mein hai rachi-basi

'ajab si bu

ki jaise

un ke anginat 'aziz jo the par-fishan

anis jo the naghma-zan

rafiq jo the mahw-e-shauq

abhi abhi wo yak-ba-yak

jal-bujhe hon tabkar lahr se

KHalifa-e-zamin ke Dhae qahr se

ruton ki na-muwafaqat

faza ki na-munasibat

parindon ki muhajrat

hai nuqta-e-uruj par

wo aane wali nasl ke liye bhi fikrmand hain