paspai

kyuuñ jagāte ho mire siine meñ ummīdoñ ko

rahne do itnā na ehsān karo

maiñ to pardesī huuñ aur aa.ī huuñ do din ke liye

kal chalī jā.ūñgī yā parsoñ chalī jā.ūñgī

aur phir aane kā imkān nahīñ

roz yuuñ ghar se nikalnā bhī to āsān nahīñ

kyuuñ jagāte ho mire siine meñ ummīdoñ ko

kyuuñ jalāte ho mire dil ke charāġh

maiñ ne ye saare diye ḳhud hī bujhā Daale haiñ

aap is bastī ko tārīk banā rakkhā hai

jis tarah jañg kī rātoñ ko baḌe shahroñ meñ

batiyāñ ḳhud hī bujhā dete haiñ

zindagī ke sabhī āsār miTā dete haiñ

is tarah

maiñ ne ye saare diye ḳhud hī bujhā Daale haiñ

aap is bastī ko tārīk banā rakkhā hai

is pe har raat na.e hamle huā karte the

āsmānoñ se ka.ī dushman-e-jāñ tayyāre

inhīñ sham.oñ kā nishāna rakh kar

bam girā jaate the aur aag lagā jaate the

is ko tārīk hī tum rahne do

dil kī duniyā meñ ujālā na karo

merī ummīdoñ ko mad.hosh paḌā rahne do

tum nahīñ mānoge?

tum dekhte hī jāoge?

achchhā dekho!

lo jalāo mire siine ke charāġh

dil kī bastī meñ charāġhāñ kar do

phir mire jiine kaa..... yā marne kaa..... sāmāñ kar do

kyun jagate ho mere sine mein ummidon ko

rahne do itna na ehsan karo

main to pardesi hun aur aai hun do din ke liye

kal chali jaungi ya parson chali jaungi

aur phir aane ka imkan nahin

roz yun ghar se nikalna bhi to aasan nahin

kyun jagate ho mere sine mein ummidon ko

kyun jalate ho mere dil ke charagh

main ne ye sare diye KHud hi bujha Dale hain

aap is basti ko tarik bana rakkha hai

jis tarah jang ki raaton ko baDe shahron mein

batiyan KHud hi bujha dete hain

zindagi ke sabhi aasar miTa dete hain

is tarah

main ne ye sare diye KHud hi bujha Dale hain

aap is basti ko tarik bana rakkha hai

is pe har raat nae hamle hua karte the

aasmanon se kai dushman-e-jaan tayyare

inhin shamon ka nishana rakh kar

bam gira jate the aur aag laga jate the

is ko tarik hi tum rahne do

dil ki duniya mein ujala na karo

meri ummidon ko madhosh paDa rahne do

tum nahin manoge?

tum dekhte hi jaoge?

achchha dekho!

lo jalao mere sine ke charagh

dil ki basti mein charaghan kar do

phir mere jine ka ya marne ka saman kar do