pesh-goi

hañsī khokhlī sī hañsī

aur pothī pe ik haath rakh kar

mujhe ghuur kar

gungunāyā

yahāñ se vahāñ tak

mujhe ek bhī sabz patta dikhā.ī nahīñ de rahā

ek bhī bāñsurī kī madhur taan

paanī kī gāgar ke nīche chhalaktī huī vahshī hirnī sī āñkheñ

koī ek chamkīlā aañsū bhī baaqī nahīñ hai

dhuāñ raakh aur ḳhuun

dhartī kī ujḌī huī kokh meñ chand jhulsī huī haDDiyāñ

adh jale prem-pattroñ ke Dhāñche

daraḳhtoñ kī lāsheñ

makānoñ kī uḌtī huī dhajjiyāñ

sone rastoñ pe phirtī huī khokhlī sī havā ke sivā

aur kuchh bhī mujhe yaañ dikhā.ī nahīñ de rahā

baḌī der tak maiñ ne būḌhe nujūmī kī bāteñ sunīñ

aur ābād rāhoñ pe ḳhush-posh joḌoñ ko aañsū kī chilman se dekhā kiyā

phir achānak

na-jāne kahāñ ik bigul sā bajā

aur na jaane vo kaise nikal kar mire sāmne aa gayā

ek bhīñgā muḌe nāḳhunoñ vaalā ifrīt

jo pahle din se

mirī aañkh meñ chhup ke baiThā huā thā

mire ḳhuun par pal rahā thā

hansi khokhli si hansi

aur pothi pe ek hath rakh kar

mujhe ghur kar

gungunaya

yahan se wahan tak

mujhe ek bhi sabz patta dikhai nahin de raha

ek bhi bansuri ki madhur tan

pani ki gagar ke niche chhalakti hui wahshi hirni si aankhen

koi ek chamkila aansu bhi baqi nahin hai

dhuan rakh aur KHun

dharti ki ujDi hui kokh mein chand jhulsi hui haDDiyan

adh jale prem-pattron ke Dhanche

daraKHton ki lashen

makanon ki uDti hui dhajjiyan

sone raston pe phirti hui khokhli si hawa ke siwa

aur kuchh bhi mujhe yan dikhai nahin de raha

baDi der tak main ne buDhe nujumi ki baaten sunin

aur aabaad rahon pe KHush-posh joDon ko aansu ki chilman se dekha kiya

phir achanak

na-jaane kahan ek bigul sa baja

aur na jaane wo kaise nikal kar mere samne aa gaya

ek bhinga muDe naKHunon wala ifrit

jo pahle din se

meri aankh mein chhup ke baiTha hua tha

mere KHun par pal raha tha