phulon ki bahaar

de rahī hai lutf gul-mehñdī kī har jānib qatār

is kī har har shāḳh par haiñ phuul behad be-shumār

surḳh hai koī gulābī hai koī niilā koī

chhoTī chhoTī chittiyāñ haiñ ba.az phūloñ par paḌī

ek jānib phuul geñde ke khile haiñ zard zard

jin ke aage rang sone kā bhī ho jaatā hai gard

is kī ḳhushbū se mo.attar dāman-e-gulzār hai

phuul ye champā kā hai yā tabla-e-attār hai

dekh kar bashshāsh ho jaatā hai qalb-e-pur-mehan

phuul guḌhal kā hai yā āveza-e-gosh-e-chaman

mahv-e-hairat hai latāfat dekh kar rang-e-gulāb

ye vo gul hai jis kā mil saktā nahīñ hargiz javāb

husn meñ Duubī huī hai is kī har har pankhuḌī

is kī ḳhushbū hai mashām-e-ārzū kī zindagī

sub.h ko is ke liye kyā kyā tarastī hai nasīm

kyā qayāmat hai gul-e-shab-bū kī jāñ-parvar shamīm

yā-ilāhī in meñ ye bāteñ kahāñ se aa ga.iiñ

dekh kar hairān rah jaatī hai chashm-e-nukta-bīñ

de rahi hai lutf gul-mehndi ki har jaanib qatar

is ki har har shaKH par hain phul behad be-shumar

surKH hai koi gulabi hai koi nila koi

chhoTi chhoTi chittiyan hain baz phulon par paDi

ek jaanib phul gende ke khile hain zard zard

jin ke aage rang sone ka bhi ho jata hai gard

is ki KHushbu se moattar daman-e-gulzar hai

phul ye champa ka hai ya tabla-e-attar hai

dekh kar bashshash ho jata hai qalb-e-pur-mehan

phul guDhal ka hai ya aaweza-e-gosh-e-chaman

mahw-e-hairat hai latafat dekh kar rang-e-gulab

ye wo gul hai jis ka mil sakta nahin hargiz jawab

husn mein Dubi hui hai is ki har har pankhuDi

is ki KHushbu hai masham-e-arzu ki zindagi

subh ko is ke liye kya kya tarasti hai nasim

kya qayamat hai gul-e-shab-bu ki jaan-parwar shamim

ya-ilahi in mein ye baaten kahan se aa gain

dekh kar hairan rah jati hai chashm-e-nukta-bin