post-traumatic stress disorder

ka.ī rāteñ vahāñ bedrōm meñ baiThī huī haiñ

na sotī haiñ na kuchh kahtī haiñ baiThī ghūrtī haiñ

kabhī dīvār par chipkī akelī chhipkalī ko

kabhī pankhe ke uupar jaal buntī makḌiyoñ ko

kitābeñ farsh par murda paḌī haiñ aur un ke paas

ka.ī misre ka.ī kirdār baiThe ro rahe haiñ

haiñ kuchh bechainiyāñ jo balcony meñ hī khaḌī haiñ

ajab sī ik rhythm meñ saañs bhartī chhoḌtī sī

ka.ī ḳhud-kush ḳhayāloñ ne vahīñ Derā kiyā hai

magar ik aas un ko kūdne se roktī hai

kitchen ke sink meñ baiThī hai ik baasī sī badbū

kisī ko bhī vahāñ aane se bharsak roktī hai

magar ik pyaas aa jaatī hai fridge tak reñgtī sī

jo Duubī ghūñT-bhar paanī meñ til til mar rahī hai

hai ik afsurdagī jo saare ghar meñ ghūmtī sī

kabhī bechainiyoñ se mil ke siina pīTtī hai

kabhī rotī hai yādoñ ke gale lag kar phaphak kar

kabhī dālān meñ jā kar vo cigarette phūñktī hai

maiñ puure ghar ko baiThā dekhtā huuñ ek kone se

gayā ik shaḳhs aur ghar meñ mere majma.a lagā hai

kai raaten wahan bedroom mein baiThi hui hain

na soti hain na kuchh kahti hain baiThi ghurti hain

kabhi diwar par chipki akeli chhipkali ko

kabhi pankhe ke upar jal bunti makDiyon ko

kitaben farsh par murda paDi hain aur un ke pas

kai misre kai kirdar baiThe ro rahe hain

hain kuchh bechainiyan jo balcony mein hi khaDi hain

ajab si ek rhythm mein sans bharti chhoDti si

kai KHud-kush KHayalon ne wahin Dera kiya hai

magar ek aas un ko kudne se rokti hai

kitchen ke sink mein baiThi hai ek basi si badbu

kisi ko bhi wahan aane se bharsak rokti hai

magar ek pyas aa jati hai fridge tak rengti si

jo Dubi ghunT-bhar pani mein til til mar rahi hai

hai ek afsurdagi jo sare ghar mein ghumti si

kabhi bechainiyon se mil ke sina piTti hai

kabhi roti hai yaadon ke gale lag kar phaphak kar

kabhi dalan mein ja kar wo cigarette phunkti hai

main pure ghar ko baiTha dekhta hun ek kone se

gaya ek shaKHs aur ghar mein mere majma laga hai