prometheus

zamīn kā ḳhūb-sūrat suDaul jism

zaḳhmoñ se chuur

dard se karāh rahā hai

zamīnī ḳhudāoñ kī sang-dilī dekh kar āsmānoñ par maujūd devtā bhī shashdar haiñ

ki unhoñ ne rāz-e-hayāt chhupāyā thā

maut ke saudāgar nahīñ bane the

lāshoñ ke Dher par apne ḳhvāboñ ke shīsh-mahal nahīñ tā'mīr kiye the

zeus ne to sirf aag chhupā.ī thī

lekin

mohazzab duniyā ke zamīnī aaqā

unhoñ ne zamīn ko maut ke capsule meñ tabdīl kar diyā

hamārī jannat meñ

duudh aur shahd nahīñ

lāshoñ kī nadiyāñ bahtī haiñ

yahāñ zindagī nahīñ maut ko davām hai

yahāñ yazdāñ nahīñ ahraman kā raaj hai

prometheus

kyā isī din ke liye tum ne aag churā.ī thī

aur rāz-e-hayāt faash karne kī sazā kaaTī thī

prometheus

zamīn ke phephḌe oxygen kashīd karte karte thak chuke haiñ

us kī nabz Dūbtī jā rahī hai

kurra-e-arz phir zamharīr banñe kī taraf gāmzan hai

kahīñ se thoḌī sī aag lā do

ek baar phir zeus ko maat de do

zamin ka KHub-surat suDaul jism

zaKHmon se chur

dard se karah raha hai

zamini KHudaon ki sang-dili dekh kar aasmanon par maujud dewta bhi shashdar hain

ki unhon ne raaz-e-hayat chhupaya tha

maut ke saudagar nahin bane the

lashon ke Dher par apne KHwabon ke shish-mahal nahin ta'mir kiye the

zeus ne to sirf aag chhupai thi

lekin

mohazzab duniya ke zamini aaqa

unhon ne zamin ko maut ke capsule mein tabdil kar diya

hamari jannat mein

dudh aur shahd nahin

lashon ki nadiyan bahti hain

yahan zindagi nahin maut ko dawam hai

yahan yazdan nahin ahraman ka raj hai

prometheus

kya isi din ke liye tum ne aag churai thi

aur raaz-e-hayat fash karne ki saza kaTi thi

prometheus

zamin ke phephDe oxygen kashid karte karte thak chuke hain

us ki nabz Dubti ja rahi hai

kurra-e-arz phir zamharir banne ki taraf gamzan hai

kahin se thoDi si aag la do

ek bar phir zeus ko mat de do