purani kahani paDh raha hun

sahar-dam

ke jab chaar pachchīs bajte haiñ

local guzartī hai

muddat huī

maiñ usī vaqt bedār hotā huuñ

yuuñ zindagī ke tasalsul kā hissa rahā huuñ

ka.ī saal pahle jo maiñ ne kahānī likhī thī

use aaj phir paḌh rahā huuñ

ghaḌī kī taraf bhī nigāheñ haiñ merī

udāsī meñ Duubā chalā huuñ

kahānī ke kirdār

yuuñ sāmne muskurāte khaḌe haiñ

ki jaise abhī

aaj isī ek lamhe meñ

taḳhlīq hāthoñ se mere huī in kī

maiñ dekhtā huuñ

ye zākir

ye salmā

ye salmā kī ammī

ye salmā kī chhoTī bahan

gorī jāpānī guḌiyā

sharārat se kurte pe mere

qalam kī siyāhī se tajrīdī painting meñ mashġhūl

hañstī chalī jā rahī hai

kahānī ke kirdār

lafzoñ kī chādar meñ lipTe hue so rahe haiñ

magar guftugū un kī

sab iḳhtirā.ī thī merī

sabhī bāteñ maiñ kar rahā thā

mujhe fikr hai merī local na chhūTe

zamāna huā

is kahānī meñ

maiñ bhī kahīñ huuñ

kahānī sunātā huuñ

kirdār ke muñh se maiñ boltā huuñ

achānak vo kirdār

maazī kī ḳhvābīda bojhal fazā se nikal kar

mire sāmne aa khaḌe hoñ

to mumkin hai

pahchān un kī mire vāste

ḳhuub taklīf-dah jāñ-gusil aur dushvār ho

maiñ udāsī meñ Duubā chalā huuñ

ka.ī saal pahle jo maiñ ne likhī thī

kahānī ise paḌh rahā huuñ

kahīñ pahlī local na chhūTe

kahānī na ban jā.ūñ maiñ bhī

kahīñ dūsrā mujh ko paḌhne na baiThe koī

sahar-dam

ke jab chaar pachchis bajte hain

local guzarti hai

muddat hui

main usi waqt bedar hota hun

yun zindagi ke tasalsul ka hissa raha hun

kai sal pahle jo main ne kahani likhi thi

use aaj phir paDh raha hun

ghaDi ki taraf bhi nigahen hain meri

udasi mein Duba chala hun

kahani ke kirdar

yun samne muskuraate khaDe hain

ki jaise abhi

aaj isi ek lamhe mein

taKHliq hathon se mere hui in ki

main dekhta hun

ye zakir

ye salma

ye salma ki ammi

ye salma ki chhoTi bahan

gori japani guDiya

shararat se kurte pe mere

qalam ki siyahi se tajridi painting mein mashghul

hansti chali ja rahi hai

kahani ke kirdar

lafzon ki chadar mein lipTe hue so rahe hain

magar guftugu un ki

sab iKHtirai thi meri

sabhi baaten main kar raha tha

mujhe fikr hai meri local na chhuTe

zamana hua

is kahani mein

main bhi kahin hun

kahani sunata hun

kirdar ke munh se main bolta hun

achanak wo kirdar

mazi ki KHwabida bojhal faza se nikal kar

mere samne aa khaDe hon

to mumkin hai

pahchan un ki mere waste

KHub taklif-dah jaan-gusil aur dushwar ho

main udasi mein Duba chala hun

kai sal pahle jo main ne likhi thi

kahani ise paDh raha hun

kahin pahli local na chhuTe

kahani na ban jaun main bhi

kahin dusra mujh ko paDhne na baiThe koi