pyara watan

kahte haiñ jis ko bhārat-mātā mirā vatan hai

maiñ kyā batā.ūñ kaisā achchhā mirā vatan hai

saarā jahāñ dulhan hai gahnā mirā vatan hai

goyā bahisht kā ik TukḌā mirā vatan hai

maiñ huuñ vatan kā pyārā pyārā mirā vatan hai

hindostāñ ke bāġhoñ kī dil-kushā fazā.eñ

rāhat-bhare nazāre ḳhushbū bharī havā.eñ

ḳhush-rang panchhiyoñ kī man-mohnī sadā.eñ

sāvan kī kaalī kaalī vo jhūmtī ghaTā.eñ

maiñ huuñ vatan kā pyārā pyārā mirā vatan hai

gangā kī paak lahroñ kā ḳhushnumā nazāra

jamunā kā vo kināra vo dil-rubā nazāra

jis se ho ruuh taaza vo byaas kā nazāra

raavī meñ kashtiyoñ kā vo ghūmtā nazāra

maiñ huuñ vatan kā pyārā pyārā mirā vatan hai

apne vatan kā zarra-zarra hameñ hai pyārā

dil kā hai ye sahārā aur aañkh kā hai taarā

duniyā se hai nirālā bhārat kā har nazārā

baḌh kar bahisht se hai hindostān hamārā

maiñ huuñ vatan kā pyārā pyārā mirā vatan hai

kahte hain jis ko bhaarat-mata mera watan hai

main kya bataun kaisa achchha mera watan hai

sara jahan dulhan hai gahna mera watan hai

goya bahisht ka ek TukDa mera watan hai

main hun watan ka pyara pyara mera watan hai

hindostan ke baghon ki dil-kusha fazaen

rahat-bhare nazare KHushbu bhari hawaen

KHush-rang panchhiyon ki man-mohni sadaen

sawan ki kali kali wo jhumti ghaTaen

main hun watan ka pyara pyara mera watan hai

ganga ki pak lahron ka KHushnuma nazara

jamuna ka wo kinara wo dil-ruba nazara

jis se ho ruh taza wo byas ka nazara

rawi mein kashtiyon ka wo ghumta nazara

main hun watan ka pyara pyara mera watan hai

apne watan ka zarra-zarra hamein hai pyara

dil ka hai ye sahaara aur aankh ka hai tara

duniya se hai nirala bhaarat ka har nazara

baDh kar bahisht se hai hindostan hamara

main hun watan ka pyara pyara mera watan hai