pyas

jī meñ hai ki jal-thal barsūñ

par ye aañsū kis kis naam se ro.ūñgī

ik aañsū par naam hai us kā

jis ke haath savālī haiñ

ik aañsū hai us ke naam

jo sardī meñ kohar-zada un saḌkoñ par bhūkoñ martā hai

ye lambī kaalī caroñ meñ kaun sī duniyā baiThtī hai

kyā naam hai un kā kaun haiñ vo

kyā bechte haiñ

aur surḳh gulābī hoñToñ par ye giit haiñ kyoñ

par TaaT ke pīchhe hairāñ hairāñ zard se chehre

āñkhoñ meñ sapnoñ ke rauzan

sapne mīThī roTī ke

har raat ko chhup kar aate haiñ

aur din ko

ghar ghar ghī se lithḌe chīnī ke bartan ko dhone kī ḳhātir

kaun bhalā ab paanī garm kare

raakh ujḌe sapnoñ kī

aur namkīn garm paanī in āñkhoñ kā

begam sāhibā kī ghar kī

aur sāhab kī laaD bharī āñkheñ

logo

un se kab sindūr bharī māñgoñ aur chhan-chhan kartī rang-birañgī

chūḌiyoñ ko phir jī bhar ke dekhā hai kabhī

ye lo paanī baras rahā hai

paanī khārā mīThā aur kasīlā paanī

dhuāñ ban kar gale meñ aTak rahā hai

thoḌā khāñs hī lo

ye chāhat hī phandā ban kar aañsū ke raste se nikle

har aañsū kis kis naam ke

is ke us ke

apne tumhāre kal ke aaj ke yā phir aane vaalī kal ke

jo saaf saleT kī mānind gum-sum hai

aur maiñ saare samundar aañsū pī kar pyāsī hī rah jaatī huuñ

ji mein hai ki jal-thal barsun

par ye aansu kis kis nam se roungi

ek aansu par nam hai us ka

jis ke hath sawali hain

ek aansu hai us ke nam

jo sardi mein kohar-zada un saDkon par bhukon marta hai

ye lambi kali caron mein kaun si duniya baiThti hai

kya nam hai un ka kaun hain wo

kya bechte hain

aur surKH gulabi honTon par ye git hain kyon

par TaT ke pichhe hairan hairan zard se chehre

aankhon mein sapnon ke rauzan

sapne miThi roTi ke

har raat ko chhup kar aate hain

aur din ko

ghar ghar ghi se lithDe chini ke bartan ko dhone ki KHatir

kaun bhala ab pani garm kare

rakh ujDe sapnon ki

aur namkin garm pani in aankhon ka

begam sahiba ki ghar ki

aur sahab ki laD bhari aankhen

logo

un se kab sindur bhari mangon aur chhan-chhan karti rang-birangi

chuDiyon ko phir ji bhar ke dekha hai kabhi

ye lo pani baras raha hai

pani khaara miTha aur kasila pani

dhuan ban kar gale mein aTak raha hai

thoDa khans hi lo

ye chahat hi phanda ban kar aansu ke raste se nikle

har aansu kis kis nam ke

is ke us ke

apne tumhaare kal ke aaj ke ya phir aane wali kal ke

jo saf saleT ki manind gum-sum hai

aur main sare samundar aansu pi kar pyasi hi rah jati hun