pyas ki devi

ishāroñ kī raanī

sar apnā hilā kar

aur āñkhoñ ko maTkā ke botal dikhā kar

lubhātī hai sau tarah se baar baar

maiñ har baar kahtā huuñ mere liye to nahīñ ye

to ik jhaTke se cork uḌā kar adā se

vo botal se ik dā.era merī āñkhoñ ke aage banā kar

mujhe phir dikhātī hai

magar maiñ use be-ta.assur nigāhoñ se taktā huuñ

vo mashrūb shīshe meñ bhartī hai

aur āvāz us kī sunā kar

mujhe dekhtī hai kan-añkhiyoñ se goyā

us āvāz par us ke shīshe meñ Dhal jā.ūñgā

maiñ kahtā huuñ qulqul hai achchhī par aisā bhī kyā

to vo chauḌe aur gahre sāġhar meñ thoḌī girā kar

mire muñh ke nazdīk lā kar hilā kar suñghātī hai mashrūb

jo sāġhar kināroñ ko chhūtā huā sā

bhañvar raqs kartā huā jhūmtā hai

buḳhārāt uḌte rijhāte haiñ phir bhī

rijhāte kahāñ haiñ

kabhī rang ḳhush-rang mujh ko dikhātī hai

aur apne laboñ par

kabhī zā.iqoñ ke tasavvur meñ Duubī zabāñ phertī hai

magar but banā maiñ ye sab dekhtā huuñ

ye mashrūb maiñ piinā kyoñ chāhūñgā

maiñ kahtā huuñ kyoñ tum ko lagtā hai maiñ pī hī lūñgā

sañbhaltā huā dekh kar hañs ke kahtī hai chakh ke to dekho

ise chakkho yā tishnagī hī ko chakho

magar tishnagī hī to maiñ pī chukā huuñ

to phir ye bhalā kyoñ maiñ kahtā huuñ us se

to vo saada rangīn talḳh aur shīrīñ bhare ḳhālī sab

pyāle sharābeñ gilās aur sharbat

ka.ī botaleñ aur paanī vaġhaira sajā detī hai

maiñ kahtā huuñ samjho

maiñ phir aur phir aur phir us se kahtā huuñ samjho

ye samjho mujhe pyaas bilkul nahīñ hai

ishaaron ki rani

sar apna hila kar

aur aankhon ko maTka ke botal dikha kar

lubhati hai sau tarah se bar bar

main har bar kahta hun mere liye to nahin ye

to ek jhaTke se cork uDa kar ada se

wo botal se ek daera meri aankhon ke aage bana kar

mujhe phir dikhati hai

magar main use be-tassur nigahon se takta hun

wo mashrub shishe mein bharti hai

aur aawaz us ki suna kar

mujhe dekhti hai kan-ankhiyon se goya

us aawaz par us ke shishe mein Dhal jaunga

main kahta hun qulqul hai achchhi par aisa bhi kya

to wo chauDe aur gahre saghar mein thoDi gira kar

mere munh ke nazdik la kar hila kar sunghati hai mashrub

jo saghar kinaron ko chhuta hua sa

bhanwar raqs karta hua jhumta hai

buKHaraat uDte rijhate hain phir bhi

rijhate kahan hain

kabhi rang KHush-rang mujh ko dikhati hai

aur apne labon par

kabhi zaiqon ke tasawwur mein Dubi zaban pherti hai

magar but bana main ye sab dekhta hun

ye mashrub main pina kyon chahunga

main kahta hun kyon tum ko lagta hai main pi hi lunga

sanbhalta hua dekh kar hans ke kahti hai chakh ke to dekho

ise chakkho ya tishnagi hi ko chakho

magar tishnagi hi to main pi chuka hun

to phir ye bhala kyon main kahta hun us se

to wo sada rangin talKH aur shirin bhare KHali sab

pyale sharaben gilas aur sharbat

kai botalen aur pani waghaira saja deti hai

main kahta hun samjho

main phir aur phir aur phir us se kahta hun samjho

ye samjho mujhe pyas bilkul nahin hai