pyas

vo duur pyāsī zamīñ ko dekho

ki jis ke dāman kī vus.atoñ meñ

zarūrateñ le rahī haiñ añgḌā.iyāñ musalsal

ufuq ufuq par uñDeltī haiñ sarāb

kartī haiñ har jihat ko ġhubār

pahnā.iyāñ musalsal

vo duur pyāsī zamīñ ko dekho

jhulastī āñkhoñ se dekhtī hai

falak kī jānib

dahakte hoñToñ se chāhtī hai

sulagte lahje se kah rahī hai

koī to ho

jo mirī shikasta anā ke lāshe pe chaar aañsū bahātā jaa.e

ye pyaas merī

miTātā jaa.e

havā ke jhoñke abhī abhī ye payām laa.e

ki duur pyāsī zamīñ ke siine pe

daaġh ban kar baras chukī haiñ

do-chār būñdeñ

wo dur pyasi zamin ko dekho

ki jis ke daman ki wusaton mein

zaruraten le rahi hain angDaiyan musalsal

ufuq ufuq par unDelti hain sarab

karti hain har jihat ko ghubar

pahnaiyan musalsal

wo dur pyasi zamin ko dekho

jhulasti aankhon se dekhti hai

falak ki jaanib

dahakte honTon se chahti hai

sulagte lahje se kah rahi hai

koi to ho

jo meri shikasta ana ke lashe pe chaar aansu bahata jae

ye pyas meri

miTata jae

hawa ke jhonke abhi abhi ye payam lae

ki dur pyasi zamin ke sine pe

dagh ban kar baras chuki hain

do-chaar bunden