qabil ka saya

ḳhudā ke ḳhauf se apne gunāhoñ par ḳhajil ho kar

vo paiham girya kartā thā

vo apne bhaa.ī ke lāshe pe paiham girya kartā thā

lahū āvāz detā thā zamīñ kī ḳhaak rusvā se

ḳhudā kā arsh kaañp uThtā thā is fariyād ko san kar

barādar-kush sazā paate the patthar ban ke jiite the

aur un ke dil kī dhaḌkan band ho jaatī thī sīnoñ meñ

aur un kā ḳhuun in kī sard sharyānoñ pe hañstā thā

magar is daur meñ koī ḳhudā aisā nahīñ kartā

ki ab shahroñ kī hālat agle sahrāoñ se behtar hai

ki ab shahroñ meñ maar o azhdar o kargas nahīñ milte

kutub-ḳhānoñ meñ afkār-o-aqā.ed jalva-farmā haiñ

hazāroñ dars-gāheñ dā.ī-e-aqdār-e-insāñ haiñ

siyah saḌkoñ pe kāreñ haiñ fazāoñ meñ haiñ tayyāre

imārāt-e-buland apne falak-paimā darīchoñ se

makoḌoñ kī tarah chalte hue jismoñ ko taktī haiñ

hamāre shahr māman haiñ hamāre shahr gulshan haiñ

ab in shahroñ meñ farsūda ḳhudā kī kyā zarūrat hai

ḳhudā ḳhāmosh hai aur ḳhauf-o-ġham se nīm-jāñ insāñ

havā kī lahr ko bhī maut kī aahaT samajhte haiñ

kisī ko kuchh nazar aatā nahīñ lekin koī jazba

ye chupke chupke kahtā hai ki ai hābīl ai hābīl

halākat ke na.e sāmān se ārāsta ho kar

galī-kūchoñ meñ aa pahuñchā hai phir qābīl kā saaya

KHuda ke KHauf se apne gunahon par KHajil ho kar

wo paiham girya karta tha

wo apne bhai ke lashe pe paiham girya karta tha

lahu aawaz deta tha zamin ki KHak ruswa se

KHuda ka arsh kanp uThta tha is fariyaad ko san kar

baradar-kush saza pate the patthar ban ke jite the

aur un ke dil ki dhaDkan band ho jati thi sinon mein

aur un ka KHun in ki sard sharyanon pe hansta tha

magar is daur mein koi KHuda aisa nahin karta

ki ab shahron ki haalat agle sahraon se behtar hai

ki ab shahron mein mar o azhdar o kargas nahin milte

kutub-KHanon mein afkar-o-aqaed jalwa-farma hain

hazaron dars-gahen dai-e-aqdar-e-insan hain

siyah saDkon pe karen hain fazaon mein hain tayyare

imaraat-e-buland apne falak-paima darichon se

makoDon ki tarah chalte hue jismon ko takti hain

hamare shahr maman hain hamare shahr gulshan hain

ab in shahron mein farsuda KHuda ki kya zarurat hai

KHuda KHamosh hai aur KHauf-o-gham se nim-jaan insan

hawa ki lahr ko bhi maut ki aahaT samajhte hain

kisi ko kuchh nazar aata nahin lekin koi jazba

ye chupke chupke kahta hai ki ai habil ai habil

halakat ke nae saman se aarasta ho kar

gali-kuchon mein aa pahuncha hai phir qabil ka saya