qasr-e-viran

maiñ us ko taktā rahtā huuñ

jo farruḳh-zād kī ġhazloñ

kī sūrat ḳhūbsūrat hai

ki jis ke phuul se tan ko

kisī rangīn titlī ke

rasīle mo'atabar hoñToñ

ke bosoñ kī zarūrat hai

vo ik shahkār hai shāyad

ḳhudā-e-pāk ke fan kā

ki jis kī sādgī meñ bhī

hai raqsāñ husn kā jaadū

kamar siina ho gardan ho

ki us ke dast aur baazū

tarāsheñ sab kī aisī haiñ

ki jaise la.al ke chāqū

jabīñ par maah kā jalva

aur us par abr ke gesū

sulagte gore gāloñ par

shafaq ke ġhāze kī ḳhushbū

gulāboñ se phaḌakte lab

aur us par pyaas be-qābū

haiñ nargis kī tarah us kī

chamaktī jhiil sī āñkheñ

magar be-nūr haiñ aisī

ki jaise tang ġhāroñ kī

siyah palkoñ pe Thahre hoñ

añdherī raat ke aañsū

ye manzar ruuh par merī

pighalte shīshoñ kī sūrat

muqattar hotā rahtā hai

ki jis kī sozishoñ meñ maiñ

taḌaptā chīḳhtā rahtā

huuñ sub.h-o-shām har ik pal

ki merī dhaḌkanoñ sāñsoñ

ko chāhe munjamid kar do

magar is ḳhūb-rū duniyā

ke tārīk āsmānoñ ko

mirī āñkhoñ ke tāroñ se

jahāñ tak ho sake bhar do

ye sun kar qasr ke saare

dar-o-dīvār par tūfāñ

sā barpā hone lagtā hai

ki ai nādān shahzāde

tū aisā kar nahīñ saktā

junūñ kī ujḌī māñgoñ meñ

tū afshāñ bhar nahīñ saktā

tirī dhaḌkan tirī sāñseñ

tirī ḳhvāboñ se pur āñkheñ

tire ajdād ke sūraj

kī kirnoñ kī amānat haiñ

jo shāhī taḳht par raushan

charāġhoñ kī zamānat haiñ

main us ko takta rahta hun

jo farruKH-zad ki ghazlon

ki surat KHubsurat hai

ki jis ke phul se tan ko

kisi rangin titli ke

rasile mo'atabar honTon

ke boson ki zarurat hai

wo ek shahkar hai shayad

KHuda-e-pak ke fan ka

ki jis ki sadgi mein bhi

hai raqsan husn ka jadu

kamar sina ho gardan ho

ki us ke dast aur bazu

tarashen sab ki aisi hain

ki jaise lal ke chaqu

jabin par mah ka jalwa

aur us par abr ke gesu

sulagte gore galon par

shafaq ke ghaze ki KHushbu

gulabon se phaDakte lab

aur us par pyas be-qabu

hain nargis ki tarah us ki

chamakti jhil si aankhen

magar be-nur hain aisi

ki jaise tang ghaaron ki

siyah palkon pe Thahre hon

andheri raat ke aansu

ye manzar ruh par meri

pighalte shishon ki surat

muqattar hota rahta hai

ki jis ki sozishon mein main

taDapta chiKHta rahta

hun subh-o-sham har ek pal

ki meri dhaDkanon sanson

ko chahe munjamid kar do

magar is KHub-ru duniya

ke tarik aasmanon ko

meri aankhon ke taron se

jahan tak ho sake bhar do

ye sun kar qasr ke sare

dar-o-diwar par tufan

sa barpa hone lagta hai

ki ai nadan shahzade

tu aisa kar nahin sakta

junun ki ujDi mangon mein

tu afshan bhar nahin sakta

teri dhaDkan teri sansen

teri KHwabon se pur aankhen

tere ajdad ke suraj

ki kirnon ki amanat hain

jo shahi taKHt par raushan

charaghon ki zamanat hain