qaum ki pukar

uTh ki miTā jaatā hai qaum kā saarā vaqār

dāman-e-izz-o-vaqār

dast-e-ġhulāmī se taar

ho bhī zarā hoshiyār

mard-e-zalālat-shi.ār

uTh ki miTā jaatā hai qaum kā saarā vaqār

nūr-e-guhar-bār ban parda-e-zulmat nahīñ

lamha-e-rāhat nahīñ

arsa-e-ishrat nahīñ

pahlī sī rif.at nahīñ

aglī sī shaukat nahīñ

nūr-e-guhar-bār ban parda-e-zulmat nahīñ

tū vahī insān hai tā-ba-falak jo gayā

rif.at-e-parvāz lā

auj-e-surayyā pe jā

sarmadī naġhma sunā

sote huoñ ko jagā

tū vahī insān hai tā-ba-falak jo gayā

soz nahīñ saaz ban ġhaib kī āvāz ban

mulk kā shahbāz ban

qaum kā dam-sāz ban

sūrat-e-e.ajāz ban

tāqat-e-parvāz ban

soz nahīñ saaz ban ġhaib kī āvāz ban

qaum tabāh aur tū haif ki ḳhāmosh hai

dil meñ na kuchh josh hai

mahv-e-ġham-e-dosh hai

aish meñ mad.hosh hai

ahd-farāmosh hai

qaum tabāh aur tū haif ki ḳhāmosh hai

niiñd ke maato uTho pheñk do jām-o-ayāġh

bujh gayā qaumī charāġh

luT gayā millat kā baaġh

dho bhī do zulmat kā daaġh

dil kā lagāo surāġh

niiñd ke maato uTho pheñk do jām-o-ayāġh

uTh ki miTa jata hai qaum ka sara waqar

daman-e-izz-o-waqar

dast-e-ghulami se tar

ho bhi zara hoshiyar

mard-e-zalalat-shiar

uTh ki miTa jata hai qaum ka sara waqar

nur-e-guhar-bar ban parda-e-zulmat nahin

lamha-e-rahat nahin

arsa-e-ishrat nahin

pahli si rifat nahin

agli si shaukat nahin

nur-e-guhar-bar ban parda-e-zulmat nahin

tu wahi insan hai ta-ba-falak jo gaya

rifat-e-parwaz la

auj-e-surayya pe ja

sarmadi naghma suna

sote huon ko jaga

tu wahi insan hai ta-ba-falak jo gaya

soz nahin saz ban ghaib ki aawaz ban

mulk ka shahbaz ban

qaum ka dam-saz ban

surat-e-eajaz ban

taqat-e-parwaz ban

soz nahin saz ban ghaib ki aawaz ban

qaum tabah aur tu haif ki KHamosh hai

dil mein na kuchh josh hai

mahw-e-gham-e-dosh hai

aish mein madhosh hai

ahd-faramosh hai

qaum tabah aur tu haif ki KHamosh hai

nind ke mato uTho phenk do jam-o-ayagh

bujh gaya qaumi charagh

luT gaya millat ka bagh

dho bhi do zulmat ka dagh

dil ka lagao suragh

nind ke mato uTho phenk do jam-o-ayagh