قوم کی پکار

اٹھ کہ مٹا جاتا ہے قوم کا سارا وقار

دامن عز و وقار

دست غلامی سے تار

ہو بھی ذرا ہوشیار

مرد ضلالت شعار

اٹھ کہ مٹا جاتا ہے قوم کا سارا وقار

نور گہر بار بن پردۂ ظلمت نہیں

لمحۂ راحت نہیں

عرصۂ عشرت نہیں

پہلی سی رفعت نہیں

اگلی سی شوکت نہیں

نور گہر بار بن پردۂ ظلمت نہیں

تو وہی انسان ہے تا بہ فلک جو گیا

رفعت پرواز لا

اوج ثریا پہ جا

سرمدی نغمہ سنا

سوتے ہوؤں کو جگا

تو وہی انسان ہے تا بہ فلک جو گیا

سوز نہیں ساز بن غیب کی آواز بن

ملک کا شہباز بن

قوم کا دم ساز بن

صورت اعجاز بن

طاقت پرواز بن

سوز نہیں ساز بن غیب کی آواز بن

قوم تباہ اور تو حیف کہ خاموش ہے

دل میں نہ کچھ جوش ہے

محو غم دوش ہے

عیش میں مدہوش ہے

عہد فراموش ہے

قوم تباہ اور تو حیف کہ خاموش ہے

نیند کے ماتو اٹھو پھینک دو جام و ایاغ

بجھ گیا قومی چراغ

لٹ گیا ملت کا باغ

دھو بھی دو ظلمت کا داغ

دل کا لگاؤ سراغ

نیند کے ماتو اٹھو پھینک دو جام و ایاغ