qissa nai lakiron ka

abhī to nazroñ ke lab pe taaza

lahū meñ Duube har ek manzar kā zā.iqa hai

ġhamoñ ke patthar kī nok ne jo

diloñ ke shīshe pe

ek katba likhā thā

ab bhī chamak rahā hai

lab-o-sadā ke

har ek rishte meñ

bū lahū kī basī huī hai

abhī to puurī sadī bhī guzrī nahīñ hai

tum to abhī se

miTTī kī soñdhī ḳhushbū

kī khoj meñ ho

abhī to mausam ke qāfiloñ ko

nazar ke sunsān rāstoñ se

ka.ī sadī tak guzarnā hogā

ki rafta rafta hī

aa.ine par

na.e ta'alluq kī dhuul kī tah

dabīz ho ga.ī

ham apnī unglī se us pe qissa

na.ī lakīroñ kā likh sakeñge

abhi to nazron ke lab pe taza

lahu mein Dube har ek manzar ka zaiqa hai

ghamon ke patthar ki nok ne jo

dilon ke shishe pe

ek katba likha tha

ab bhi chamak raha hai

lab-o-sada ke

har ek rishte mein

bu lahu ki basi hui hai

abhi to puri sadi bhi guzri nahin hai

tum to abhi se

miTTi ki sondhi KHushbu

ki khoj mein ho

abhi to mausam ke qafilon ko

nazar ke sunsan raston se

kai sadi tak guzarna hoga

ki rafta rafta hi

aaine par

nae ta'alluq ki dhul ki tah

dabiz ho gai

hum apni ungli se us pe qissa

nai lakiron ka likh sakenge