qiston mein KHwab

maiñ jab chhoTā thā

to chalte chalte ḳhvāb dekhā kartā thā

aksar maiñ sirf ḳhvāb dekhne ke liye hī chaltā thā

sub.h ko dopahar ko shaam ko

raat ko gahrī niiñd sotā thā

jo gahrī niiñd sote haiñ vo ḳhvāb nahīñ dekhte

saare ḳhvāboñ kā markazī kirdār maiñ hī huā kartā thā

magar mere qarībī aur pyāre log bhī us meñ shāmil rahte the

mere ḳhvāb tavīl aur manzūm hote the

aur maiñ aksar un meñ tarmīm kiyā kartā thā

kuchh ḳhvāb jo dil ko na bhāte the

unheñ chhoḌ kar na.e ḳhvāb kī shurūāt kartā thā

ab maiñ raat bhar

aur ḳhaas kar sub.h ko

qistoñ meñ ḳhvāb dekhtā huuñ

adh-jale ḳhvāb

kuchh ḳhvāboñ se najāt miltī hai

to jī ḳhush ho jaatā hai

saare ḳhvāb jaane pahchāne hote haiñ

mānūs ḳhvāb

tafsīlī ḳhvāb

kuchh ḳhvāb roza-marra kī tafsīloñ se vāzeh

kuchh suhāne ḳhvāb jab ruk jaate haiñ

to unheñ dekhne kī nākām koshish kartā huuñ

ḳhvāb ḳhud nahīñ dohrāte

an-dekhe ḳhvāb

ab ḳhvāboñ kī duniyā meñ haiñ

main jab chhoTa tha

to chalte chalte KHwab dekha karta tha

aksar main sirf KHwab dekhne ke liye hi chalta tha

subh ko dopahar ko sham ko

raat ko gahri nind sota tha

jo gahri nind sote hain wo KHwab nahin dekhte

sare KHwabon ka markazi kirdar main hi hua karta tha

magar mere qaribi aur pyare log bhi us mein shamil rahte the

mere KHwab tawil aur manzum hote the

aur main aksar un mein tarmim kiya karta tha

kuchh KHwab jo dil ko na bhate the

unhen chhoD kar nae KHwab ki shuruat karta tha

ab main raat bhar

aur KHas kar subh ko

qiston mein KHwab dekhta hun

adh-jale KHwab

kuchh KHwabon se najat milti hai

to ji KHush ho jata hai

sare KHwab jaane pahchane hote hain

manus KHwab

tafsili KHwab

kuchh KHwab roza-marra ki tafsilon se wazeh

kuchh suhane KHwab jab ruk jate hain

to unhen dekhne ki nakaam koshish karta hun

KHwab KHud nahin dohraate

an-dekhe KHwab

ab KHwabon ki duniya mein hain