rahdari mein gunjti nazm

bāra-darī meñ chāñd sar-e-shām ho gayā

rah-dāriyoñ ke parde uḌātī rahī havā

mash.al-tale ġhulām kī talvār kho ga.ī

burgī pe jab sitāra girā

raat thī bahut

aur shāh-e-vaqt apne hī nashshe meñ mast thā

pishvāz nīche dā.era us ko nahīñ milā

bāra-darī meñ aag lagī thī

lagī rahī

aur bāñsurī ke nai kahīñ ḳhāmosh rah ga.ī

aur chāñd shāhzādī ke qadmoñ meñ so gayā

phir yuuñ huā ki dard se

aañsū hue gulāb

aur āñhkeñ huiiñ charāġh

yalġhār rāstoñ pe rahī

āñdhiyoñ kī shab

aur dhuul āsmān ko barbād kar ga.ī

sab āñganoñ ke kachche ghaḌoñ meñ bharī hai ret

paanī lahū huā

sarshār o mast kaise

zamīñ par girā hai taaj

so is ke ba.ad chaal o tārīḳh ne chalī

yalġhār-e-barq-o-bād huī hai galī galī

bosoñ meñ bhīgtī huī tanhā.iyoñ kī yaad

aur sub.h kī azaañ se uḌe dilbarī ke rañg

aur ḳhvāb jañgaloñ meñ bhaTakte rahe kahīñ

bālā-hsār

shahr-e-pinah

bām-o-dar

mahal

tūfānī bārishoñ meñ bhī khilte rahe gulāb

ham-juft saarā shahr

bāra-darī meñ zindagī be-nām ho ga.ī

bara-dari mein chand sar-e-sham ho gaya

rah-dariyon ke parde uDati rahi hawa

mashal-tale ghulam ki talwar kho gai

burgi pe jab sitara gira

raat thi bahut

aur shah-e-waqt apne hi nashshe mein mast tha

pishwaz niche daera us ko nahin mila

bara-dari mein aag lagi thi

lagi rahi

aur bansuri ke nai kahin KHamosh rah gai

aur chand shahzadi ke qadmon mein so gaya

phir yun hua ki dard se

aansu hue gulab

aur aanhken huin charagh

yalghaar raston pe rahi

aandhiyon ki shab

aur dhul aasman ko barbaad kar gai

sab aanganon ke kachche ghaDon mein bhari hai ret

pani lahu hua

sarshaar o mast kaise

zamin par gira hai taj

so is ke baad chaal o tariKH ne chali

yalghaar-e-barq-o-baad hui hai gali gali

boson mein bhigti hui tanhaiyon ki yaad

aur subh ki azan se uDe dilbari ke rang

aur KHwab jangalon mein bhaTakte rahe kahin

baala-hsar

shahr-e-pinah

baam-o-dar

mahal

tufani barishon mein bhi khilte rahe gulab

ham-juft sara shahr

bara-dari mein zindagi be-nam ho gai