raat ham-zad

mere pahlū se saraktā huā din Dhal jaa.e

terī zulfoñ meñ mahaktī huī raat

apnī āġhosh meñ le jaa.e

mire dil kā qarār

rafta rafta tirī ḳhāmosh nigāhoñ meñ kahīñ

raat ke pichhle pahar

chāñd ubhar aa.e agar

mire siine meñ jo ghanghor ḳhalā hai use raushan kar de

zindagī mujh ko tirī soḳhta chāloñ kī qasam

maut manzūr hai lekin tirā ye doġhlā-pan

jiine detā nahīñ insāñ ko sarāpā ehsās

kyā huā maiñ ne kahīñ sach to nahīñ kah Daalā

jhuuT har uns kī ījād kahāñ hai batlā

sach bhī to sāniha-e-zīst kā parvarda hai

terā honā bhī to yaañ mere ta.iiñ hai ro le

terā hañsnā bhī ḳhudā ḳhair kare maar na de

mere pahlū se saraktā huā din aa pahuñchā

terī zulfoñ meñ mahaktī huī raat

Dhal bhī chukī

mere pahlu se sarakta hua din Dhal jae

teri zulfon mein mahakti hui raat

apni aaghosh mein le jae

mere dil ka qarar

rafta rafta teri KHamosh nigahon mein kahin

raat ke pichhle pahar

chand ubhar aae agar

mere sine mein jo ghanghor KHala hai use raushan kar de

zindagi mujh ko teri soKHta chaalon ki qasam

maut manzur hai lekin tera ye doghla-pan

jine deta nahin insan ko sarapa ehsas

kya hua main ne kahin sach to nahin kah Dala

jhuT har uns ki ijad kahan hai batla

sach bhi to saniha-e-zist ka parwarda hai

tera hona bhi to yan mere tain hai ro le

tera hansna bhi KHuda KHair kare mar na de

mere pahlu se sarakta hua din aa pahuncha

teri zulfon mein mahakti hui raat

Dhal bhi chuki