raat

maiñ dekhtā huuñ

vīrān shāh-rāhoñ par reñgtī ḳhāmoshī

sūraj ke ghar lauTte hī

be-libās ho kar nāchne lagtī hai

aur talāsh kartī hai kuchh muskurāte chehre

añdherā chhāne lagtā hai

vīrānī dālān meñ baiThī bain kartī aur

apnī mahrūmī kā iz.hār kartī hai

kirā.e ke qabristān meñ dafn murde

rāt-bhar ehtijāj karte haiñ

apnī nā-mukammal ḳhvāhishoñ ko saḌkoñ par jalāte haiñ

jis ke dhueñ se āsmān kā

rang kaalā paḌ jaatā hai

raat kī tārīkī manhūs āvāzeñ nikāltī hai

vīrān saḌak ke ek taraf khaḌī būḌhī tavā.if

apne gāhak ke ravayye se ḳhaufzada hai

ullū aur chamgādaḌ bhī raat se ḳhafā ho kar

ab din meñ safar karte haiñ

murda raat gahrī ho jaatī hai

jaaḌe kī ThiThurātī sardī meñ

fōtpath par baiThī ek nannhī kalī

ek roTī ke liye ḳhudā ke signature kī muntazir hai

mahñgī gāḌiyoñ ke sāmne

giḌgiḌātī tavā.if kā ek aañsū

mere zehn meñ

be-shumār savālāt chhoḌ gayā hai

main dekhta hun

viran shah-rahon par rengti KHamoshi

suraj ke ghar lauTte hi

be-libas ho kar nachne lagti hai

aur talash karti hai kuchh muskuraate chehre

andhera chhane lagta hai

virani dalan mein baiThi bain karti aur

apni mahrumi ka izhaar karti hai

kirae ke qabristan mein dafn murde

raat-bhar ehtijaj karte hain

apni na-mukammal KHwahishon ko saDkon par jalate hain

jis ke dhuen se aasman ka

rang kala paD jata hai

raat ki tariki manhus aawazen nikalti hai

viran saDak ke ek taraf khaDi buDhi tawaif

apne gahak ke rawayye se KHaufzada hai

ullu aur chamgadaD bhi raat se KHafa ho kar

ab din mein safar karte hain

murda raat gahri ho jati hai

jaDe ki ThiThuraati sardi mein

footpath par baiThi ek nannhi kali

ek roTi ke liye KHuda ke signature ki muntazir hai

mahngi gaDiyon ke samne

giDgiDati tawaif ka ek aansu

mere zehn mein

be-shumar sawalat chhoD gaya hai