raat subh-e-bahaar hogi

muhīb sāyoñ meñ pal rahā huuñ

ki laakh rañj-o-alam meñ mahsūr ek jins-e-girāñ hai iqrār jis kā

āfāt kā sabab hai

maiñ kaise bhūlūñ maiñ bhuul jā.ūñ kashmakash

maiñ dhuul āñkhoñ meñ jhoñk Dālūñ

to raat sub.h-e-bahār hogī

mirā tasalsul mere muqaddar ke saath paiham ravāñ-davāñ hai

zamīn saa.e ko jhel legī maiñ chal paḌūñgā

jo bhed jeboñ par bojh bante haiñ

jo bhuul galiyāñ miTā ke rū-posh ho ga.ī hai

vo chhup ga.ī

vo chhup ga.ī hai to pair miTTī safar kā anjām qarz kar lo

jo aisā kar lo to sub.h chāTo zamīn chāTo

mujhe na dekho ki maiñ to nasl-e-qadīm-sāla se muntashir huuñ

maiñ lafz DhūñDūñ ki ḳhud tārīk ā.īne meñ utaar luuñ dekhūñ toḌ Dālūñ

yūñhī tasalsul ke saath qismat kā vāsta hai jo ā.īna hai

maiñ us ko toḌūñ maiñ us ko joḌūñ ki jis kā iqrār to garāñ hai

muhib sayon mein pal raha hun

ki lakh ranj-o-alam mein mahsur ek jins-e-giran hai iqrar jis ka

aafat ka sabab hai

main kaise bhulun main bhul jaun kashmakash

main dhul aankhon mein jhonk Dalun

to raat subh-e-bahaar hogi

mera tasalsul mere muqaddar ke sath paiham rawan-dawan hai

zamin sae ko jhel legi main chal paDunga

jo bhed jebon par bojh bante hain

jo bhul galiyan miTa ke ru-posh ho gai hai

wo chhup gai

wo chhup gai hai to pair miTTi safar ka anjam qarz kar lo

jo aisa kar lo to subh chaTo zamin chaTo

mujhe na dekho ki main to nasl-e-qadim-sala se muntashir hun

main lafz DhunDun ki KHud tarik aaine mein utar lun dekhun toD Dalun

yunhi tasalsul ke sath qismat ka wasta hai jo aaina hai

main us ko toDun main us ko joDun ki jis ka iqrar to garan hai