raazi-nama

raat ke kaale badan pe sitāre Tāñkne kī mashq

apnī ruuh par paivand lagāne jaisī mushkil nahīñ hotī

āsmān se laTaktī shāḳhoñ par

mannatoñ ke dhāge kab tak bāñdhe jā sakte haiñ

bujhe hue ko.ele aur giilī lakḌī chiñgārī nahīñ pakaḌte

soī huī sard mohabbat ne karvaT badal lī hai

charāġh le kar safar par nikalne vaalī titlī ko

chaudah din purāne chāñd se kyā ġharaz

bahtī huī saḌkoñ se apnā rāsta chun lenā

aur āvāzoñ meñ se apne hisse kī āvāz sun lenā

āsmān ke bas meñ kab hai

us ke juzdān meñ lipTī sahīfe jaisī raat nāzil ho ga.ī hai

saat suroñ meñ bahtā raat kā ye pahlā pahar aur

kin-min sā barastā tumhārā narm ehsās

bārish ke baa.eñ gaal par rakhā huā hai

aag bārish kī bolī bol rahī hai

september kī gyārahvīñ raat hai

saḌak kī silvaToñ par aThkheliyāñ letī mohabbat ko

bārish ke paanī se bā-vazū daraḳhtoñ ne sajda kar liyā hai

raat ke kale badan pe sitare Tankne ki mashq

apni ruh par paiwand lagane jaisi mushkil nahin hoti

aasman se laTakti shaKHon par

mannaton ke dhage kab tak bandhe ja sakte hain

bujhe hue koele aur gili lakDi chingari nahin pakaDte

soi hui sard mohabbat ne karwaT badal li hai

charagh le kar safar par nikalne wali titli ko

chaudah din purane chand se kya gharaz

bahti hui saDkon se apna rasta chun lena

aur aawazon mein se apne hisse ki aawaz sun lena

aasman ke bas mein kab hai

us ke juzdan mein lipTi sahife jaisi raat nazil ho gai hai

sat suron mein bahta raat ka ye pahla pahar aur

kin-min sa barasta tumhaara narm ehsas

barish ke baen gal par rakha hua hai

aag barish ki boli bol rahi hai

september ki gyarahwin raat hai

saDak ki silwaTon par aThkheliyan leti mohabbat ko

barish ke pani se ba-wazu daraKHton ne sajda kar liya hai