raftagan

tum yahāñ so jaao

tum ko ye jagah bhī gar na miltī tum gila ham se na karte

ham tumhāre saath kuchh miTTī diye jaate haiñ

isī miTTī se ab ham-rañg ho jaao

ye sannāTā tumhāre saath hai ab is se ham-āhañg ho jaao

tumhāre chāñd sūraj mar chuke haiñ

tumhārī raushnī

zulmat

umiid o nā-umīdī

naav kāġhaz kī

gharauñde ret ke

bachpan javānī, umr kā ik ek lamha

tum jo murda aur zinda chhoḌe jaate ho

vo ham auroñ ko de deñge

akele jis tarah aa.e ho tum vo sab bhī ā.eñge yahāñ tak

sab ye varna chhoḌ jā.eñge!

koī rahzan bane yā raah roke

ham-safar ho yā koī rasta dikhā.e

apnā rasta sab ko tanhā paar karnā hai

hamārā kaam suulī par chaḌhānā hai so ham karte haiñ

lekin bojh suulī kā tumheñ ko hai uThānā

tum yahāñ so jaao

apnā bojh uThā.e ham bhī ā.eñge

hamāre chāñd sūraj bhī mareñge!

tum yahan so jao

tum ko ye jagah bhi gar na milti tum gila hum se na karte

hum tumhaare sath kuchh miTTi diye jate hain

isi miTTi se ab ham-rang ho jao

ye sannaTa tumhaare sath hai ab is se ham-ahang ho jao

tumhaare chand suraj mar chuke hain

tumhaari raushni

zulmat

umid o na-umidi

naw kaghaz ki

gharaunde ret ke

bachpan jawani, umr ka ek ek lamha

tum jo murda aur zinda chhoDe jate ho

wo hum auron ko de denge

akele jis tarah aae ho tum wo sab bhi aaenge yahan tak

sab ye warna chhoD jaenge!

koi rahzan bane ya rah roke

ham-safar ho ya koi rasta dikhae

apna rasta sab ko tanha par karna hai

hamara kaam suli par chaDhana hai so hum karte hain

lekin bojh suli ka tumhein ko hai uThana

tum yahan so jao

apna bojh uThae hum bhi aaenge

hamare chand suraj bhi marenge!