rah-guzasht

raat bhar husn-e-tasavvur se jilā paate rahe

ḳhvāb mere ruḳh-e-mahtāb ko sharmāte rahe

jin bahishtoñ se maiñ guzrā huuñ vo yaad aatī ga.iiñ

shaiḳh kal ḳhuld kī tārīf jo farmāte rahe

jannat-o-dozaḳh-o-a.arāf se maiñ guzrā huuñ

ḳhunkī-e-husn ke sho.ale mujhe pighlāte rahe

vo tahayyur vo nigāhoñ kā tajassus he he

ḳhvāb se hosh ke aalam meñ nazar aate rahe

raqs kartā rahā har zarra rah-e-ġhurbat meñ

kyā bagūle the mire gird jo mañDlāte rahe

haath ḳhālī thā mirā aur bharī thiiñ āñkheñ

jām-e-labrez mai-e-nāb se Takrāte rahe

ajnabī chehre jo mānūs nazar aate the

apnī ḳhāmoshī meñ kyā kuchh nahīñ farmāte rahe

TuuT ke girte rahe ban ke shahāb-e-sāqib

sher-o-ilhām ke motī kabhī barsāte rahe

kuchh azāzīl o sarāfīl bhī raste meñ mile

un ke changul se magar bach ke nikal aate rahe

qissa-e-ġhaib chhiḌā yā suḳhan-e-būd-o-adam

sham.a ke gird patange the ki mañDlāte rahe

aañch sahte rahe furqat kī bhī āshob kī bhī

jī ko ḳhvāboñ se ḳhayāloñ se bhī bahlāte rahe

kabhī be-sāḳhta phūloñ kī taraf uTThe qadam

kabhī ḳhushbū hī se ham ruuh ko mahkāte rahe

Dhal gayā din to ubhar aa.e umīdoñ ke charāġh

na sahī chāñd sitāre hī nazar aate rahe

raat bhar husn-e-tasawwur se jila pate rahe

KHwab mere ruKH-e-mahtab ko sharmate rahe

jin bahishton se main guzra hun wo yaad aati gain

shaiKH kal KHuld ki tarif jo farmate rahe

jannat-o-dozaKH-o-araf se main guzra hun

KHunki-e-husn ke shoale mujhe pighlate rahe

wo tahayyur wo nigahon ka tajassus he he

KHwab se hosh ke aalam mein nazar aate rahe

raqs karta raha har zarra rah-e-ghurbat mein

kya bagule the mere gird jo manDlate rahe

hath KHali tha mera aur bhari thin aankhen

jam-e-labrez mai-e-nab se Takraate rahe

ajnabi chehre jo manus nazar aate the

apni KHamoshi mein kya kuchh nahin farmate rahe

TuT ke girte rahe ban ke shahab-e-saqib

sher-o-ilham ke moti kabhi barsate rahe

kuchh azazil o sarafil bhi raste mein mile

un ke changul se magar bach ke nikal aate rahe

qissa-e-ghaib chhiDa ya suKHan-e-bud-o-adam

shama ke gird patange the ki manDlate rahe

aanch sahte rahe furqat ki bhi aashob ki bhi

ji ko KHwabon se KHayalon se bhi bahlate rahe

kabhi be-saKHta phulon ki taraf uTThe qadam

kabhi KHushbu hi se hum ruh ko mahkate rahe

Dhal gaya din to ubhar aae umidon ke charagh

na sahi chand sitare hi nazar aate rahe