rahguzar

phir vahī baḌhte hue rukte hue qadmoñ kī chaap

phir vahī sahmī huī simTī huī sargoshiyāñ

phir vahī bahkī huī mahkī huī sī āhaTeñ

phir vahī gaatī sī lahrātī sī kuchh madhoshiyāñ

zindagī tūfān thī sailāb thī bhauñchāl thī

vaqt phir bhī karvaToñ par karvaTeñ letā rahā

qāfile is raah par aate rahe jaate rahe

rāhbar sab ko masāfat kā sila detā rahā

vo tabassum jis ko rote haiñ ka.ī ujḌe suhāg

ban rahā hai ik lachaktā ḳhaar apne paañv meñ

vo nazar jo kal talak har jism ko Dastī rahī

aaj sustāne lagī hai maslahat kī chhāñv meñ

kitnī ummīdoñ ke madfan us ke hāthoñ ban chuke

kitne armānoñ ke lāshe us ne ḳhud kafnā.e haiñ

aah ye maqtal ki jis ke pāsbānī ke liye!

kitne mustaqbil fanā ke dosh par lahrā.e haiñ

kulfatoñ se tañg aa kar be-ḳhudī kī khoj meñ

qāfile is raah par aate raheñ jaate raheñ

rāhbar sab ko masāfat kā sila detā rahe

rāh-rau apne tajassus kā sila paate raheñ

phir wahi baDhte hue rukte hue qadmon ki chap

phir wahi sahmi hui simTi hui sargoshiyan

phir wahi bahki hui mahki hui si aahaTen

phir wahi gati si lahraati si kuchh madhoshiyan

zindagi tufan thi sailab thi bhaunchaal thi

waqt phir bhi karwaTon par karwaTen leta raha

qafile is rah par aate rahe jate rahe

rahbar sab ko masafat ka sila deta raha

wo tabassum jis ko rote hain kai ujDe suhag

ban raha hai ek lachakta KHar apne panw mein

wo nazar jo kal talak har jism ko Dasti rahi

aaj sustane lagi hai maslahat ki chhanw mein

kitni ummidon ke madfan us ke hathon ban chuke

kitne armanon ke lashe us ne KHud kafnae hain

aah ye maqtal ki jis ke pasbani ke liye!

kitne mustaqbil fana ke dosh par lahrae hain

kulfaton se tang aa kar be-KHudi ki khoj mein

qafile is rah par aate rahen jate rahen

rahbar sab ko masafat ka sila deta rahe

rah-rau apne tajassus ka sila pate rahen