rail chalne lagi

sar-nigūñ sabz jhanḌī kā halkā pharerā fazāoñ meñ lahrā gayā

bench par os meñ bhīge pattoñ kī chādar ko jhoñke uḌā le ga.e

rail kī pTriyoñ par udāsī kī gūñjeñ badan kī surañgoñ se yak-laḳht bāhar nikalne lagīñ

whistle bajne lagī

rail chalne lagī

dil-girafta musāfir ka.ī manziloñ kī aziyyat ke paikar meñ Dhalne lage

ek maañ ne duāoñ se labrez bosoñ-bharī thāliyoñ ko

kisī jañg par gāmzan apne beTe kī jholī meñ ulTā diyā

ek aurat kī chhātī pe

sadiyoñ kī Thahrī huī ik udāsī ke be-jān pahiye guzarne lage

do baras ke farishte ke aañsū gire

whistle bajne lagī

ḳhushnumā zindagī ke dupaTTe javāñ auratoñ ke saroñ se Dhalakne lage

be-ridā ek laḌkī ne ḳhākistarī bag pakḌe hue

duur khetoñ meñ ḳhāmosh logoñ ko ruḳhsat kiyā

ik na.ī mauj phir se darīda badan meñ ubharne lagī

ek rauzan se dohrī havāoñ ke jhoñke guzarne lage

bhiiḌ kī be-ḳhayālī bharī rail meñ phir ubalne lagī

ek ThanDī udāsī usī bench par phir utarne lagī

whistle bajne lagī

rail chalne lagī

sar-nigun sabz jhanDi ka halka pharera fazaon mein lahra gaya

bench par os mein bhige patton ki chadar ko jhonke uDa le gae

rail ki pTriyon par udasi ki gunjen badan ki surangon se yak-laKHt bahar nikalne lagin

whistle bajne lagi

rail chalne lagi

dil-girafta musafir kai manzilon ki aziyyat ke paikar mein Dhalne lage

ek man ne duaon se labrez boson-bhari thaaliyon ko

kisi jang par gamzan apne beTe ki jholi mein ulTa diya

ek aurat ki chhati pe

sadiyon ki Thahri hui ek udasi ke be-jaan pahiye guzarne lage

do baras ke farishte ke aansu gire

whistle bajne lagi

KHushnuma zindagi ke dupaTTe jawan auraton ke saron se Dhalakne lage

be-rida ek laDki ne KHakistari bag pakDe hue

dur kheton mein KHamosh logon ko ruKHsat kiya

ek nai mauj phir se darida badan mein ubharne lagi

ek rauzan se dohri hawaon ke jhonke guzarne lage

bhiD ki be-KHayali bhari rail mein phir ubalne lagi

ek ThanDi udasi usi bench par phir utarne lagi

whistle bajne lagi

rail chalne lagi